Şaredarîya Amedî ya Şaristanê Girdî, wendoxan seba îmtîhananê Mektebo Berz yê Perwerdeyê Beden û Sporî bêpere amade kena. Hemşaredar Dogan Hatun salona sporî zîyaret kerd û kursîyeran rê serkewtiş waşt.
Serekîya Daîreya Xizmetê Ciwan û Sporî, seba ke piştî bido ciwanan, kursanê bêpereyan virazena. Kurso ke seba ke wendoxî îmtîhananê Mektebo Berz yê Perwerdeyê Beden û Sporî (BESYO) rê amade bibê yeno dayene, seba ke waştiş zêde bî, sînorê kontenjanî ame wedaritene. Kurs heta peynîya tebaxe rojana Dişeme, Çarşeme û Îne de Salona Sporî ya Baglarî de dewam keno û perwerdekardê profesyonelî tede xîzmet danê.
Îmkanê servîsa bêpereye
Seba ke wendoxî kursî de rehet bibê, destekê servîsa bêpereye zî yena dayene.
Hişyarî vera madeyê tiryakî
Perwerdeyê amadekarîye reyde antrenorê Şaredarîya Şaristanê Girdî, wendoxê ke beşdarê kursî benê, înan rê xebata hişyarî û hesasîyetî vera madeyê tiryakî awan kenê.
Perwerdekarî ke wendoxan derheqê mudaxîlbîyayîş vera madeyê tiryakî agahdar kenê, bi sloganê "Girêdaye mebe, bibe azad" xebata hişyarîye kenê.
Hemşaredar Hatunî salona sporî de wendoxan reyde ame têhet
Hemşaredarê Şaredarîya Amedî ya Şaristanê Girdî Dogan Hatunî, wendoxê ke Salona Sporî ya Baglarî de kurs vînenê, zîyaret kerd. Zîyaretî de Sekreterê Pêroyî Emrullah Gorduk û Hetkarê Sekreterê Pêroyî Reşat Bakan Hemşaredar Hatunî reyde bî. Hatunî ke derheqê perwerdeyî de serkaranê beşan ra melumatî girewtî, salone de etud kerd û wendoxan reyde qisey kerd. Hemşaredar Hatunî trîbuna salona de temaşeyê perwerdeyê ke kursîyeran rê yeno dayene kerd û wendoxan rê serkewtiş waşt
'Ez wazena ameyoxî de wendoxanê weşan perwerde bikera'
Kursîyere Zîlan Aydemire va ke a seba îmtihananê beşê perwerdeyê bedenî ameya tîya û wina dewam kerd: "Ez wazena ke biba antrenore. Ez wazena ke ameyox de wendoxanê weşan perwerde bikerî. No îmkan Şaredarîya Şaristanê Girdî dano ma. Ez zaf sipas kena înan rê."
Kursîyer Serhat Ekinciyî ke dîyar kerd perwerdeyî faydeyîn ê, wina qisey kerd: "Ma reyna derheqê madeyê tiryakî de melumatan gênê. Ma hişyar benê. Ma derheqê babetan de ke ganî ciwanê ma, komel, keyeyî hişyar bibê, destekî gênê. Wa her kes hişyar bo. Ma vanê 'bes' madeyê bîyayîşî rê."
