Şaredarîya Amedî ya Şaristanê Girdî, şaredarîyanê qezayan reyde kombîyayîşê "Parekerdiş û Dîyarkerdişê Stratejîya Hempare ya Tecrubeyê Turîzmî" organîze kerd.

Mudirîya Şubeyê Turîzmî yê Serekîya Daîreya Karanê Kultur û Sosyalan, seba eşkerekerdişê potansîyelê turîzmî yê bajarî û dîyarkerdişê polîtîkaya hempare ya turîzmî, şaredarîyanê qezayan reyde kombîyayîşê "Parekerdiş û Dîyarkerdişê Stratejîya Hempare ya Tecrubeyê Turîzmî" organîze kerd. Kombîyayîşo ke Merkezê Kultur û Kongre de di roniştişan de ame organîzekerdene, roniştişê yewinî de, derheqê xebatanê turîzmî de yew pêşkêşî ame kerdene. Û sewbîna derheqê xebatanê Mudirîya Şubeyê Buroyanê Tetbîqkerdiş û Kontrolkerdişê Pawitişî (KUDEB) de ke girêdayeya Serekîya Daîreya Îmarî ya de, malumatêko kilm ame dayene.

Qerarê koordînasyonê ortaxî

Roniştişê dîyinî de zî pêşnîyaz, rexne û fikrê qezayan ê hetê turîzmî ra ameyî parekerdene. Na çarçewa de qerar ame dayene ke yew koordînasyono hempar bêro awankerdene.

'Ma warê turîzmî de cayêko muhîm de yê'

Sereka Daîreya Karanê Kultur û Sosyalan Çagla Sanay ke akerdişê kombîyayîşî de qisey kerd, dîyar kerd ke bajarî de gelek erjî est ê ke paweyê keşifkerdişî yê û ganî bêrê keşifkerdene û va ke bajarî nê warî de gelek medenîyetan rê wayîrîye kerda. Sanay wina dewam kerd: "Mîrasê kulturî, erjê kulturî û warê gastronomîyê xo yê cîyayîyan reyde ma warê turîzmî de cayêko muhîm de yê. Embazê ma yê ke tîmê turîzmî de yê, raşta zî nê warî de xebatê înan ê zaf weşî est ê. Sûrê ma û Baxçeyê Hewselî UNESCO de lîsteya mîrasê dinya de ca gênê."

'Amed bajarêko zaf dewlemend o'

Sanay ke amacê organîzekerdişê kombîyayîşî ra behs kerd, qiseykerdişê xo wina ramit: "Ma waşt ke, embazanê warê kultur û turîzmî reyde bêrê têhet û nê koordînasyonî hîna weş aver berê. Ma qezayanê xo de eşkenê se bikerê? Problemê qezayanê ma çi yê? Cayê ma yê turîstîkî ke nêyenê dîyene çi yê? Ma senî eşkenê turîstan berê ê cayan? Ma senî eşkenê merkezî reyde çîyêk bikerê? Ma seba ke nê hemînan ser o qisey bikerê, tîya de yê. Çunke ma zanê, gelek cayê ma est ê ke paweyê keşifkerdişî yê. Pêşnîyazê ke do şima ra bêrê, seba ma zaf û zaf muhîm ê. Amed bajarêko zaf dewlemend o."

Sanay îfade kerd ke warê turîzmî de Şaredarîya Şaristanê Girdî sey sekretarya wezîfe gêna û dîyar kerd ke naye ra dima zî no wezîfe do dewam bikero.