Hemşaredarê Şaredarîya Amedî ya Şaristanê Girdî Serra Bucak û Dogan Hatunî, 120 wendekaranê ke kursanê Serekîya Daîreya Xizmetanê Ciwan û Sporî ra îstîfade kenê, înan rê hacetê wendişî vila kerdî.

Wendekarê ke kursanê Serekîya Daîreya Xizmetanê Ciwan û Sporî de beşdarê dersan benê, înan rê hacetê wendişî ameyî vilakerdene. Programo ke Sumerparkî de virazîya, tede Hemşaredarê Şaredarîya Şaristanê Girdî Serra Bucak û Dogan Hatun, serekê daîreyanê eleqedaran û wendekarî amade bîy.

Hemşaredaran, çanteyê ke tede hacetê wendişî est bî, wendekaran rê vila kerdî.

Serekîya Daîreya Xizmetanê Ciwan û Sporî, seba ke neseypêyîya fersendî ya perwerdeyî bêro wedarnayene, do 880 wendekaranê bînan rê zî ardimê hacetanê wendişî biko. Verê ke serra perwerdeyî ya newîye dest pê bikero, do wendekaranê ke rewşa înan a madî kêm a, çantayê ke tede hacetê wendişî est ê, bêrê vilakerdene.