Şaredarîya Amedî ya Şaristanê Girdî, seba ke cinîyan rê karêk peyda biko û projeyê berpirsîyarîya komelkî aver bero, 9 şubeyanê cîya-cîyayan de kursê hamnanî akerdî û nê kursan ra hezar û 500 cinîyan îstîfade kerd.

Serekîya Daîreya Xizmetanê Cinî û Keyeyî, aşmanê hamnanî de Merkezanê Cuya Cinîyan de kursê hamnanî ke akerdî, tede babeta karî de piştgirîya cinîyan kerd.

Hezar û 500 cinîyê kursîyeran rê sertîfîka

6 Merkezanê Cuya Cinîyan de ke taxanê cîya-cîyayan de xebetîyenê û girêdayeyê Serekîya Daîreya Xizmetanê Cinî û Keyeyî yê, 10 yê Tekstîlî, 8 yê Huneranê Destan, 6 yê Wendiş-Nuştişî, Muhasebe, Enstruman, Spor, Aşitî, 2 yê Etudî û 13 Kursê Quranî tede pêro pîya 9 şubeyanê cîya-cîyayan de cinîyan rê kursê hunerê meslegî û hobî ameyî dayene. Kursanê hamnanî yê 9 şubeyanê cîya-cîyayan ra pêro pîya hezar û 500 cinîyan îstîfade kerd.

Kursê Sporî ke Merkezê Cuya Cinîyan yê Koşuyoluyî de dewam keno, tede fealîyetanê sporî sey xopawitiş, têkoşîno nêzdî, egzersîz û pîlatesî ra teqrîben 200 cinîyan îstîfade kerd. Cinîyê kursîyerî heqê girewtişê sertîfîka qezenc kerd ke hetê Perwerdeyê Şarî ra ameya tesdîqkerdene.

Domanî zî nêameyî xovîrrakerdene

Fealîyetanê ke hamnan ra dewam kerdî, tede cinîyan xo aver berdêne la domanî zî nêameyî xovîrrakerdene. Sinfanê etudî yê ke 2 hebî yê, tede perwerdeyê ke bi rehberîya perwerdekaran ameyê dayene, tira 169 domanan îstîfade kerd.

Fealîyetê sosyalî ameyî kerdene

Merkezanê Cuya Cinîyan de odayanê kayî de, seba domanê cinîyanê ke ameyî kursan, hetê averşîyayîşê domanan ra fealîyetî ameyî kerdene. 569 domanî beşdarê fealîyetanê odayanê kayî bîy. Çarçewaya fealîyetanê sosyalan de 130 domanî şîyî sînema, 40 domanî şîyî tîyatro, 15 domanî şîyî hewze.

Perwerdeyê seypêyîya cinsîyetê komelkî

Merkezanê Cuya Cinîyan de tena kursî nê, zaf waranê cîya-cîyayan de gelek fealîyetî ameyî kerdene. Na çarçewa de xebata hişmendîya ke derheqê seypêyîya cinsîyetê komelkî de ameye kerdene, tira 361 cinîyan îstîfade kerd.