Hemşaredara Şaredarîya Amedî ya Şaristanê Girdî Serra Bucak, Qezaya Şankûş de muxtarê taxan û şarî reyde ameye têhet û va ke ê do problemanê taxan safî bikerê.

Hemşaredara Şaredarîya Şaristanê Girdî Serra Bucak, zîyaretanê xo yê qezayan dewam kena. Hemşaredare Bucak ke şîye Qezaya Şankûş û kontrolî kerdî, aye reyde Hetkarê Sekreterê Pêroyî Reşat Bakan, serekê daîreyan û endamê meclîsî pîya bîy.

Hemşaredare Bucak, Şankûş de verê Taxa Yenîkoyî de şarî reyde ameye têhet. Qawexaneyê taxe de Bucak şarî reyde qisey kerd, goşdarîya waştişanê înan kerde.

Hemşaredare Bucak goşdarîya muxtaranê taxan kerde

Dima Serekîya Kooperatîfê Kredî û Kefaletî yê Esnaf û Senatkaran de muxtaranê taxan reyde ameye têhet, problemanê ke taxan de est ê, înan ser o muxtaran reyde fikrê xo vatî.

Beşê eleqedarî ameyî wezîfedarkerdene

Hemşaredare Bucak ke waştişê muxtaran û şarî yê rayîr, awe, kanalîzasyon û resî yew bi yew not kerdî, seba çareserîya problaman beşê eleqedarî wezîfedar kerdî.

Hemşaredare Bucak: Ma do probleman safî bikerê

Hemşaredare Bucak va ke îdareyê qeyyûmî 8 serran de yew xebate zî nêkerdo û coka heme binawanan de problem est o. Bucak dîyar kerd ke ê do heme probleman vera-vera safî bikerê.