Şaredarîya Amedî ya Şaristanê Girdî, Taxa Dokuzçeltikî ya Qezaya Yenîşehîrî de dest bi xebatanê viraştişê Bulwarê Mîr Celadetî yê 2 hezar û 200 metreyî kerd.

Serekîya Daîreya Viraştiş û Koordînasyonê Rayîr û Binawanîyan, seba ke şarê ma cayê ronîştişî yê neweyan de problemê resî nêancê, xebatanê xo dewam kena. Xebatan de dest bi viraştişê Bulwarê Mîr Celadetî yê Taxa Dokuzçeltikî ke Qezaya Yenîşehîrî de yo û dewamê Bulwarê Mahabadî yo, ame kerdene. Hedef oyo ke rayîrê îmarî yo newe ke hîrayîya xo 50 metre û dergîya xo 2 hezar û 200 metre ya, mîyanê çend aşman de biqedîyo û bêro akerdene.

'Badê ke îstîmlaqkerdene qedîya ma dest bi xebatan kerd'

Mudirê Şubeyê Viraştişê Rayîrî Bariş Çetînkaya ke derheqê xebatanê Bulwarê Mîr Celadetî de melumat da, wina va: "Bulwarê Mîr Celadetî, berpirsîyarîya Şaredarîya ma ya Şaristanê Girdî de yo û rayîrê îmarî yê Qezaya Yenîşehîrî yo. No bulwar, seba ke problemê kamukerdene est bî, awanîyê dorûverê xo zî qedîyaybî demêko derg nêameybî akerdene. La encamê xebatanê îstîmlaqkerdene ke Serekîya Daîreya Îmarî kerdî, qedîyayî û ma na mintiqa de dest bi xebate kerd."

'Rayîrê ma do 2 hezar û 200 metre derg bo'

Çetînkaya qeyd kerd ke encamê xebatanê kamukerdişî ke Serekîya Daîreya Îmarî kerdî de rijnayîşê awanîyanê ke platformê rayîrî de mendê, dewam keno û derheqê xebatanê viraştişê rayîrî de nê melumatî dayî: "Rayîrê ma, dewamê Bulwarê Mahabadî yo şar sey cadeyê 75 ke şar zano. Rayîr, rayîrê dorûverê Elezîzî ra vera Bulwarê Şêx Seîdî şono ke hema seba îstîmlaqkerdene nêameyo akerdene. Rayîrê ma teqrîben 2 hezar û 200 metre derg û 50 metre hîra yo. seba ke topografyaya na mintiqa winî ya, karê ke ma tîya de kenê, karê herr ê ke kapasîteyê înan berz a. Ma tîya de teqrîben 250 hezar metrekûbî kolaj, 100 hezar metrekûbî pirkerdiş û hem zî seba ke binawana rayîrî weş bibo û emrê rayîrî derg bo ma 100 hezar metrekûbî pirkerişê kerreyanê zaf girdan virazenê. Badê ke nê xebatê ma biqedîyê ma do vinderê ke xebatê binawanî zî biqedîyê. Badê ke xebatê binawanî qedîyayî ma plan kenê ke ma 50 hezar ton malzemeyê bingeyî rokerê û bi roniştişê sethî rayîrî akerê trafîkî."

'Hedefê ma no yo ke resêko rehet temîn bikerê'

Çetînkaya ke dîyar kerd hedefê înan o verên no yo ke resî temîn bikerê û wina bikerê ke şarê na mintiqa bieşko bi rehetî û konfor şêro û bêro keyeyê xo, wina dewam kerd: "No proses, goreyê şertanê xebate 2- 3 aşmî do biramo. Nika zaf xebate est a. Ma verê cû leşa eslî ya karî yanî kota rayîrî virazenê. Prosesanê peyênan de bi karê tratuwar, roşnî û viraştişê derûverî ma hedef kenê ke ma bulwarê xo temam bikerê. Bi no qayde ma do Qezaya Yenîşehîrî rê yew rayîrê îmarî yo newe qezenc bikerê."