Şaredarîya Amedî ya Şaristanê Girdî, dinganê bajarî de ke cayê cîya-cîyayanê bajarî de yê, xebatê pakerdiş, tamîr û pakîye kerdî.

Serekîya Daîreya Resî, seba ke dingê resê pêroyî ke cayê hempar yê şuxulnayîşê welatîyan de yê, hîna bi hîjyenîk û bi dîsîplîn bibê, xebatanê xo dewam kena.

Ekîban, goreyê waştişanê welatîyan 4 aşmanê peyênan de 37 dingan de xebate kerde. Encamê xebatan de, 2 dingê neweyî ameyî viraştene, cayê 22 dingan ame vurnayene û 13 dingî ameyî tamîrkerdene û pakkerdene. Cira zêde, heme dingê merkezê bajarî ameyî pakkerdene û şutene.

Serekîya Daîreya Resî, merkezê bajarî de viraştişê 2 dinganê neweyan dewam kena.

Ekîbî ke merkezê bajarî, qeza û taxanê dewan de goreyê îhtîyacî seba dinganê neweyan tesbîtê cayan kenê, demêko kilm de do viraştişê dingan biqedênê.