Şaredarîya Amedî ya Şaristanê Girdî, waştişê domanan ser o Merkezê Cuya Cinîyan yê Ben û Senî de Atolyeya Kompîturî akerde.

Şaredarîya Amedî ya Şaristanê Girdî, waştişê welatîyan ser o çareserîyan vîrazena. Têhetameyîşê Şarî de ke 7ê Tebaxe de taxa Ben û Senî yê Qezaya Yenîşehîrî de virazîya û Hemşaredarê Şaredarîya Şaristanê Girdî Serra Bucak û Dogan Hatun beşdar bîy, domanan bi akerdişê pankartî waştişê xo yê "Kursê Kompîturî" îfade kerd, seba naye xebate dest pêkerd.

Encamê xebatanê ke hetê Serekîya Daîreya Xizmetanê Sosyalan ra ameyî kerdene, Merkezê Cuya Cinîyan yê Ben û Senî ke girêdayeyê Serekîya Daîreya Xizmetanê Cinî û Keyeyî yo, tede Atolyeya Kompîturî ameye akerdene.

Atolyeya Kompîturî, bi 13 komputuran dest pêkerd ke xîzmet bido. Atolye ra domanê kursîyeran yê 9-14 serreyî îstîfade kenê. Atolye de seba ke gedeyî xebitnayîşê xo yê kompîturîa ver berê û dima ra averşîyayaşî teknolojîyî nêzdî ra taqîb bikê û hayîdar bibê, hetê perwerdekaranê pisporan ra perwerdeyê kompîturî yeno dayene.

Qeydî do Merkezê Cuya Cinîyan de bêrê girewtene

Cinîyê kursîyerî ke wazenê domanê înan Atolyeya Kompîturî ra îstîfade bikerê, eşkenê qeydanê înan Merkezê Cuya Cinîyan yê Ben û Senî de bikerê.

'Waştiş ame bicaardiş'

Serekê Daîreya Xizmetanê Sosyalan Serkan Demirkiranî ke derheqê babetî de melumat da, va ke înan waştişê akerdişê atolyeya kompîturî seba domanê kursîyeran ke Merkezê Cuya Cinîyan de yê, ard ca. Demirkiranî wina qisey kerd: "Têhetameyîşê Şarî yê Ben û Senî de domananê ma va 'ma wazenê kursê kompîturî abo'. Ma zî sey Serekîya Daîreya Xizmetanê Sosyalan goreyê waştişê domanan, Merkezê Cuya Cinîyanê ma ke binê Serekîya Daîreya Xizmetanê Cinî û Keyeyî de yo, tede atolyeya kompîturî akerde û ma dest bi kursanê xo kerd. Ma do dewam bikerê ke cewabê waştişanê şarê xo bidê."