Şaredarîya Amedî ya Şaristanê Girdî, bi atolyeyanê tekstîlî ke ronayê, hem cinîyan rê meslek musnena hem zî înan rê îmkan dana ke hewcedarîya kincan temîn bikerê.

Atolyeyanê tekstîlî yê Merkezanê Cuya Cinîyan ke girêdayeyê Serekîya Daîreya Xizmetanê Cinî û Keyeyan ê, tede cinîyê ke beşdar benê, hem meslek musenê hem zî seba ke hêzê ekonomî her ke şona kêmî beno, bi qumaşê ke erjanêr gênê cehd kenê ke hewcedarîya kincanê xo temîn bikerê.

'Hîna ekonomîk beno'

Kursîyeran ra Şukran Tuncay ke yena atolyeya tekstîlî, bi qumaşê ke keyeyan ra anê kincê cîya-cîyayî derzena. Tuncay qal kerd ke reya peyên seba domananê xo taximê pîjamayan deştî û wina va: "Mi bi qumaşê ke mi 150 lîre da û girewt, atolye de taximê pîjamayan viraştî. Yew taximê pîjamayan a winasî ez eşkayêne bi 500 TL bigirewtêne. Bi no qayde hîna ekonomîk beno."

'Waştişê mi o yo ke ez atolyeya xo akerî'

Kursîyere Mîhrîban Işik va ke a reya verêne beşdarê yew atolye bena. Işik va ke aye rê hîna weş o ke şêro atolye û çîyanê neweyan bimuso, coka a her roje keye de nêmanena û wina dewam kerd: "Çarşefê mi yê kehenî est bîy, mi ê nêeştî, mi ardî tîya û şuxulnayî, mi reyna tadayî. Mi seba domananê xo taximê pîjamayan deştî." Işik îfade kerd ke a atolye de birrnayîşê qumaşî û xebitnayîşê makîneya deştişî musaya û wina qeyd kerd: "Waştişê mi no yo ke ez xo aver berî û peyên de atolyeya xo ya deştişî akerî. Ez atolye de tena meslek nêmusena, embazê min ê neweyî zî bîy. Ez problemanê xo ra durî ya û keyf kena."

'Ez wazena taxa xo de atolyeya tekstîlî akerî'

Sevcan Agin zî dîyar kerd ke qet tecrubeyê yê deştişê kincan çin bo zî a zaf çî musnaya. Agin wina îfade kerd:

"Mi nêzanayêne ke derzîne ra la bivîyarna. Nika ez taximanê kincan derzena. Kesê ke wazenê ez ci rê kincan biderza zî est ê. Ez kincanê kehenan newe ra derzena, tadayîşê înan kena. Mi demêko kilm de çîyê weşî kerdî. Mi waştişanê xo ser waştişê neweyî zî zêde kerdî. Taxa ma de terzî çin o. Ez wazena ke ez deştişî aver berî û demê ameyoxî de atolyeya tekstîlî akerî. Bi no qayde ez eşkena xo rê yew ameyeyê ekonomîkî zî temîn bikerî."

Aye nêwendo la seba wendekarîya domananê xo xebetîyena

Hawa Adak zî va ke seba ke şêro atolyeya tekstîlî zaf pawita û seba ke zaf taleb est o, a eşkaya teyna di hefteyî verê cû beşdarê kursî biba. Hawa Adak dîyar kerd ke a wazena atolye de meslek bimusa û demê ameyoxî de yew kar de bixebetîya ke ci rê ameyeyê ekonomîkî temîn biko, aye va ke aye nêwendo la seba ke domanê aye biwanê, a xebetîyena.

'Kursîyeranê ke dest bi fabrîkayanê tekstîlî kerd, est ê'

Pispora Teknolojîya Kinc û Huneranê Vînayîşkî Kadrîye Çînko, di demî yo ke atolyeya tekstîlî de cinîyan rê musnena ke ê senî makîne de kincan biderzê. Çînko dîyar kerd ke seba rewşa ekonomîkî cinî eleqeyêko pîl nîşanê atolye danê û cinîyê ke waştiş û qabîlîyetê înan est o raşta bi hewayêko pratîk dest bi kar kenê û dest bi deştişî kenê. Çînko wina va: "Cinîyê ke yenê atolye, şort, atlet, badî, pantolon, eteg, taximê pîjamayan ûsn. derzenê. Tayê kursîyerî seba ke meslek bimusê yenê. Kursîyeranê ke dest bi fabrîkayanê tekstîlî kerd, est ê. Ganî atolye hîna hîra bibo."

'Qabîlîyetê ecêbî est ê'

Aksesuarê kincan de pisporî û yew mamosteya atolyeya tekstîlî Gonul Koyunsever zî qal kerd ke bi kêmbîyayîşê hêzê herînayîşî seba atolyeya tekstîlî taleb zêde bîyo. Gonul Koyunseverî wina va:  "Teberê kursîyeranê qeydkerdeyan mi rey-rey kursîyerê meymanî zî qebul kerdî. Deştişê kincan hîna kêmîmesref beno. Bi taybetî êyê ke wazenê kar bivînê zêde taleb kenê. Ez verê cû musnena ke makîneya deştişî senî bêro xebitnayene, dima musnena ke senî bêro birrnayene. Qabîlîyetê ecêbî est ê. Kursîyerê ke yew aşmî de resayî yew sewîyeyo zaf weş û dest bi deştişî kerd, est ê. Balişna, çarşef, nevresîm, taximê eşofman û pîjamayan, pantolon ûsn. derzenê."