Şaredarîya Amedî ya Bajarê Girdî û Mudirîya Weşîya Şaristanî mabênê xo de protokolêk viraşt û goreyê ey qezaya Çinarî de cinîyan rê xizmetê testê kanserê çiçikan û fekê rehimî yo bêpere yeno dayene.

Çarçewaya tetbîqî de ke Şaredarîya Bajarê Girdî û Merkezê Teşxîsê Veren, Test û Perwerdeyê Kanserî (KETEM) pîya ramnenê, cinîyan rê ke wazenê testanê vernîgirewtişî yê vera kanserê çiçikan û fwkê rehimî bikerê, qezaya Çinarî de hetkarîya mamografî ya bêpere ameye kerdene.

Serekîya Daîreya Karê Weşîye ke xebatanê xo seba pawitişê weşîya komelî û averşîyayîşî dewam kena, cinîyanê ke emrê înan mabênê 40-69 serran de yo û wazenê testanê vernîgirewtişî yê vera kanserê çiçikan û fekê rehimî bikerê, hetkarî dana înan.

Testî wasitaya mobîle ya mamografî de benê

Nê çarçewa de wasitaya mobîle ya mamografî ke Şaredarîya Bajarê Girdî data Mudirîya Weşîya Şaristanî, vera Nexweşxaneyê Dewlete yê qezaya Çinarî de dest bi xizmetî kerd.

Verê ke testî bibê, ekîbanê Şaredarîya Çinarî merkezê bajarî û taxanê dewe de xebatê hişyarîye kerdî. Cinîyanê ke waşt nê xizmetî ra îstîfade bikerê, bi wasitayanê xizmetî yê Şaredarîya Çinarî berdî testê mamografî.

Dima bi hetkarîya personel û cîhazanê Mudirîya Weşîye, wasitaya mobîle de testê cinîyan ameyî kerdene.

Cinî vera kanserî yenê hişyarkerdene

Sereka Daîreya Xizmetê Cinî û Keyeyî Ozden Gurbuz, Çinar de cinîyanê ke testê xo kerdî, înan reyde qisey kerd û va ke ganî testê vernîgirewtişî yê ke vera nêweşîya kanserî benê, nêrê xovîrrakerdene.

Çinar de 3 hewteyî xizmet do bêro dayene

Wasitaya mobîle ke do rojane 40 cinîyan rê testê kanserê çiçikan û fekê rehimî bikero, 3 hewteyî Çinar de xebatanê xo do dewam bikero.

Wasitaya mobîle ya mamografî, qezayanê Amedî yê bînan de zî do cinîyan rê xîzmet bido.