Ekîbê Şaredarîya Amedî ya Bajarê Girdî, şarê ke emrê înan aver şîyo zîyaret kenê û înan rê xizmetê miqateyê şexsî, pakîya keyeyî danê.

Şaredarîya Bajarê Girdî, xebatanê xo yê seba şarê ke emrê înan aver şîyo, dewam kena. Ekîbê ke girêdayeyê Serekîya Daîreya Xizmetanê Sosyalan ê, şonê keyeyanê kesanê ke tena ciwîyenê û înan rê xizmetê pakîye danê.

Xizmetanê berberî dest pêkerd

Wezîfedarê Yewîneya Kesanê Emrdarî, kontrolanê weşîya şarê emrdarî kenê, kesanê emrdarî rê ke îhtîyacê înan est o xizmetê tedawîya fîzîkî û rehabîlîtasyonî danê. Ekîbî reyna çarçewaya modelê fikiryayîşê xizmetê cayî de dest bi dayîşê xizmetê miqateyê şexsî (berberî) kerd seba mêrdimê emrdarî ke hewcedar ê.

'Ma şarê xo yê emrdaran rê xizmetê cîya-cîyayî kenê'

Wezîfedarê Yewîneya Kesanê Emrdarî ya Mudirîya Şûbeyê ya Astengdar û Emrdarî ya Xizmetanê Sosyalan Alî Riza Kaya, derheqê xizmetan de melumat da û va ke ê sey Şaredarîya Bajarê Girdî serra 2012 ra nat kesanê emrdaran rê ke tena ciwîyenê xizmetê pakîya keyeyî danê û va ke ê cehdê xo kenê ke tewr rind xizmet bidê kesanê emrdaran. Kayayî wina qisey kerd: "Ma şarê xo yê emrdaran rê ke emrê înan 65 serran ra cor o, tewr zaf xizmetê pakîya keyeyî û xizmetê cîya-cîyayî yê bînî danê. Nînan ra teber ma xizmetê miqateyê şexsî zî danê. Bi taybetî aşmanê hamnanî de seba ke şarê ma yo emrdar tim keyeyan de manenê û cayê înanê hereketî teng o, ma zafane aktîvîteyanê sosyalan organîze kenê û şarê xo yê emrdaran anê têhet. Ma ge-ge şarê xo yê emrdaran benê aktîvîteyanê pîknîk û gêrayîşî zî."

'Ma hetkarîya eynî û neqdî kenê'

Kayayî va ke ê aşmane 200-210 kesanê emrdaran rê xizmet danê û îlawe kerd ke ê her aşme bi hawayêko muntezem şonê keyeyanê nê kesan û xizmetê pakîye danê. Kayayî va ke ê bi fikiryayîşê şaredarîya şarperestî, şarê emrdaran rê hetkarîya eynî û neqdî kenê û va ke ê sey hetkarîya eynî paketa werdî danê û sey hetkarîya neqdî zî karta bankî danê şarî û bi no hawa hetkarîya înan kenê.

'Xizmetê ma yê teknîkî zî do dest pêbikerê'

Kayayî va ke ê seba kesanê emrdarî ke problemê resî ancenê, bi xizmetê xo wazenê hetkarî bidê ke ê bieşkê şêrê nexweşxane û dezgehanê raye û wina dewam kerd: "Ma reyna demê averî de, seba ke xizmetê ma hîna zaf kesan bigîrê xo mîyan, fikirîyenê ke keyeyan de xizmetê teknîkî zî bidê. Prosesê ma yo serekîya daîre est o. Badê ke ma ê prosesî qedêna, xizmetê ma yê teknîkî yê keyeyî zî do dest pêbikerê. Ma plan kenê ke ma xizmetê teknîkî yê sey tamîr û tadîlatê qijkekî û boyaxkerdişî ra bigîrê heta karê elektrîk û tesîsatî keyeyan de bikê."