Şaredarîya Amedî ya Bajarê Girdî, seba vîrardişê Nuştoxî Mehmed Uzunî goşdarîya dengbêjan û sohbet organîze kerd.

Bi pêşengîya Serekîya Daîreya Karê Kultur û Komelkî çarçewaya çalakîyanê vîrardişê Nuştoxî Mehmed Uzunî de yew sohbet ame viraştene. Merkezê Kultur û Kongre yê ÇandAmedî de sohbetê "Romanê Mehmed Uzunî û edebîyatî ser o" ke moderatorîya ci Rohat Bulutî kerdbî, warezaya Mehmed Uzunî Zara Uzun, nuştox Salih Agir Qoserî û Mahmut Ildogan sey qiseykerdoxan ca girewt. Sohbetî de Sereka Daîreya Karê Kultur û Komelkî Çagla Sanay, wendoxê Uzunî û edebîyatkarî beşdar bîy.

Beşdaran, bale ante romanê Nuştoxî Mehmed Uzunî yê ke yew kerraya bingeyîne ya edebîyatê kurdkî yo û edebîyatê ey ser.

'Edebîyatê Mehmed Uzunî edebîyatê sirgûnî yo'

Nuştoxan ra Salih Agir Qoserî û Mahmut Ildoganî behsê cuye û serencamê nuştişê ziwanê dayîke yê Mehmed Uzunî kerd. Qoserî bale ant ke Mehmed Uzunî Swîsre de dest bi nuştoxîye kerdo, kitabê xo uca nuştê, coka edebîyatê Mehmed Uzunî edebîyatê sirgûnî yo.

Warezaya Mehmed Uzunî Zara Uzun zî behsê vîrardişanê xo yê derheqê Mehmed Uzunî de kerd ke gama ke o ganî bî û şahidîya înan kerda. Aye îfade kerd ke wextê ke kurdkî qedexe bî, gama ke Mehmed Uzunî Radyoya Êrîvanî ke yew saet û nême kurdkî weşan kerdêne, goşdarî kerdêne, aye şahidîya xemgînîya ey kerda.

Goşdarîya dengbêjan

Keyeyê Dengbêjan de zî seba vîrardişê Mehmed Uzunî goşdarîya dengbêjan ame organîzekerdene. Dengbêj Hesenê Şilbê, Îbrahîmê Pîrikî, Silhedînê Gozelî û Keremê Şemo ke goşdarîya dengbêjan de ca girewt, kilamê Amed û herêma Serhedî wendî.