Şaredarîya Amedî ya Şaristanê Girdî, seba gedeyanê ke kreşê Zarokistanê 450 Evler de perwerde vînenê, gêrayîşê Nev Baxçeyî organîze kerd.

Programê gêrayîşî seba gedeyanê ke Kreş û Keyeyê Pawitişê Rojaneyî yê Zarokistanê 450 Evler de perwerde vînenê, ame organîzekerdene. No kreş binê Serekîya Daîreya Xizmetanê Sosyalan de xebatanê xo rameno.

Gedeyî Taxa Uç kuyulara Qezaya Yenîşehîrî de Nev Baxçe ke 30 hezar metrekare ya û tede baxçeyê sewze û meyweyan est ê,  gêrayî. Bi nê gêrayîşî gedeyî ewnîyayî ke senî toxim beno şitil, şitil beno sewze û meywe û yeno sofreyê ma ser.

Gedeyî bi destanê xo sewze û meyweyî arê dayî û mahsulê organîkî tehm kerdî û keyf kerd.

Mamosteyê Nev Baxçe ke binê Mudirîya Xizmetanê Deştan û Atolyeya Baxçekarîye ya Şaredarîya Yenîşehîrî de xebatanê xo ramena, gedeyan rê melumatî dayî. Înan derheqê metodanê neweyan û viraştişê şitilan ra toximê eslî, zuwakerdişê meyweyan baxçeyanê meyweyan de, viraştişê sewzeyan û maceraya herre ra mitbaxî de pratîk nîşan da.