Şaredarîya Amedî ya Şaristanê Girdî, seba "15ê Teşrîna Verêne Roja Gopala Sîpîye, Korîye û Emnîyetî" şaristanê astengdarê vînayîşî rê gopala sîpîye vila kerd.

Mudirê Xizmetanê Astengdar û Piran yê Serekîya Daîreya Xizmetanê Sosyalan Îsmaîl Degirmencî, munasebetê 15ê Teşrîna Verêne Roja Gopala Sîpî, Korîye û Emnîyetî de temsîlkarê komeleyanê astengdaranê vînayîşî reyde ame têhet.

Zîyareto ke Şûbeyê Komela Koranê Altınokta ya Amedî û Komela Astengdaranê Vînayîşî ya Dîcle reyde ameyî kerdene, tede Degirmencîyî ra teber endamê Komîsyonê Astengdaran yê Meclîsê Şaredarîya Şaristanê Girdî û encumenê şaredarîyanê qezayan zî beşdar bîyî.

Aktîvîteyo ke tede temsîlkarê Komela Astengdaranê Vînayîşî ya Dîcle, Kulubê Sporî yê Astengdaranê Vînayîşî yê Amedî, Kulubê Sporî yê Astengdaranê Vînayîşî yê Kayapinarî, Kulubê Sporî yê Astengdaran yê 21 Dîyarbekirî, Komelaya Koranê Altınokta, Kulubê Sporî yê Astengdaran yê Surkent 21î ca girewtî, tede 120 bastonê sîpî dîyarîyê koran bîyî ke hewcedarê înan ê,.

DBB projeyanê astengdaran aver bena

Mudirê Xizmetanê Astengdar û Pîran Îsmaîl Degirmencîyî va ke Şaredarîya Şaristanê Girdî wexto ke projeyê xo yê astengdaran awan kena, seba viraşitişê cayanê azad, serbest û emînan hereket kena.

Degirmencîyî dîyar kerd ke ê tena 15ê Teşrîna Verêne de ney, her dem astengdaran reyde yê û wina dewam kerd: "Ma do serekê komelan reyde mişewre bikê û bi hawayêko koordîne û kolektîf projeyan virazê. Seba ke ma 15ê Teşrîna Verêne ser o bale biancê û hişyarî virazê, ma înan rê Gopala sîpîye dîyarî kerd."

'Hêvîyê ma zaf ê ke bajarê ma hîna zaf bibo resayox'

Serekê Şûbeyê Komela Koranê Altınokta ya Amedî Akîf Karakaşî îfade kerd ke ê zîyaretê Şaredarîya Şaristanê Girdî ra keyf girewto.

Karakaşî nê çîyî vatî: "Hêvîyê ma zaf ê ke Şaredarîya Şaristanê Girdî demê ameyox de xebatanê xo de bajarê ma hîna zaf bikero resayox. Ez bawer kena ke Amed do bibo bajarêko %100 resayox seba şaristananê astengdarê vînayîşî."

Gopala Sîpîye dîyarîêkao manayin a

Endamê Komela Koranê Altınokta Înan Adiguzelî îfade kerd ke gopala sîpîye sembola cuya înan a û va ke dîyarîya gopala sîpîye ya Şaredarîya Şaristanê Girdî seba înan zaf manayin a.