Hemşaredaranê Şaredarîya Amedî ya Şaristanê Girdî Serra Bucak û Dogan Hatunî, derheqê erdlerzî de ke Qezaya Kale ya Malatya de bî û girdîya ey 5,9 bî û Amedî de zî ame hîskerdiş, va ke çîyêko negatîf nêresayo înan û wina dewam kerd: " wa şarê ma rê kefaret bo ke bajaranê mintiqa de ke erdlerz hîs kerdo. Ma bi heme beşanê xo waran ra yê."

Erdlerzo ke Qezaya Kale ya Malatya de bî û girdîya ey 5.9 bî, sere de Amed û zaf bajaran de tesîr kerd. Erdlerzî ra dima şaristanijî vejîyayî teber. Badê erdlerzî sazgeh û dezgehê eleqedarî, sere de Malatya û Amed zaf bajaran de vera rewşanê muhtemelan cigêrayîş kenê.

Hemşaredare Bucak: Wa bajaranê mintiqa rê kefaret bo

Hemşaredara Şaredarîya Amedî ya Şaristanê Girdî Serra Bucak, hesabê xo yê medyaya komelkî de no mesaj vila kerd: "Ma Amed, Malatya û bajaranê mintiqa ke erdlerz hîs kerdo, wa înan kefaret bo. Nika bajarê ma de ekîbê ma qadan de yê û goreyê melumatanê ke ma gênê, çîyêko negatîf çin o. Ekîb û xebatkarê ma do dewam bikerê ke qadan de bibê û tedbîran zêde bikerê."

Hemşaredar Hatun: Ma bi heme beşanê xo waran ra yê

Hemşaredar Dogan Hatun ke Qezaya Baglarî de şaristananijan reyde ke vejîyayî teber, ame têhet, hesabê xo yê medyaya komelkî de wina nuşt: "Ma vanê wa kefaret bo heme şaristananê ma ra seba erdlerzo ke Qezaya Kale ya Malatyayî ra vejîya û bajarê ma de zî ame hîskerdiş. Ma bi heme beşanê xo qadan de yê. Heta nika bajarê ma de tu rewşêka negatîfe nêameya dîyayene."

Îtfaîye ekîbî awan kerdî

Serekîya Daîreya Îtfaîye ya Şaredarîya Amedî ya Şaristanê Girdî ke erdlerzî reyde kewte alarma sûre zî 2 ekîbê cigêrayîş û xelesnayîşî ke her yew 10 kesan ra yeno meydan, viraştî. Ekîbê îtfaîye, vera her rewşe merkezê Amedî de gêrenê. Ekîbî, sere de Malatya û zaf bajaran de vera rewşanê negatîfan ke erdlerzî ra bieşkê bivejîyê meydan, seba ardimî hazir pawenê.