Hemşaredara Şaredarîya Amedî ya Şaristanê Girdî Serra Bucak, Gêl de muxtar û şarî reyde ameye têhet û va ke amancê înan o yewin o yo ke şar heme xizmetan ra îstîfade bikero.

Hemşaredara Şaredarîya Şaristanê Girdî Serra Bucak, Taxayê Kaya, Babalan û Akalanî yê qezaya Gêlî zîyaret kerdî û muxtar û şarî reyde ameye têhet. Hemşaredare Bucak ke taxan de eleqeyêko pîl dî, şarî reyde derheqê problemanê rayîr, awe û resî de fikrî qisey kerdî. Hemşaredare Bucak ke yew bi yew waştişê şaristanan not girewt va "Amancê ma yo yewin o yo ke no şar heme xizmetan ra îstîfade bikero" û qeyd kerd ke ê do xizmetêk ke probleman safî keno, bîyarê meydan. Hemşaredare Bucak ke problemê ke taxan de yenê ciwîyayene ca de kontrol kerdî, derheqê waştişan de ke şarî ard ziwan beşê eleqedarî wezîfedar kerdî.

Hemşaredare Bucak: Îdareyê 8 serrî yê qeyyûmî reyde ma apey şîyî

Hemşaredare Bucak ke zîyaretanê taxe de qisey kerd, bale ant xisaranê ke prosesê 8 serrî yê qeyyûmî viraştî ser û va ke waştişê taxanê dewan nêameyê caardene. Hemşaredare Bucak wina dewam kerd: "Ma nê 8 serran de taxanê xo yê dewan de çi nêkerdêne ke. Tewr tay ma problemê xo yê sey awe û kanalîzasyonî bîardêne daraxa tewr şenike. Û belkî ma ewro xebatanê neweyan qisey kerdêne. La ma cayê xo de zî nêvindertî, bawer bikerê ma apey şîyî."

'Ma 25 serrî yo ke metodê xizmetê şarî zanê'

Hemşaredare Bucak ke îfade kerd ke ê bê ferq cayan de xizmet kenê, wina va: "Ma partîya nê şarî yê. Ma rê ferq nêkeno ke kam qeza de ma qezenç kerd yan nêkerda, ma do nê şarî rê xizmet bikê. Metod û rayîrê xizmetê nê şarî zî ma 25 serrî yo ke zanê. Ma reyna soz danê şima ke ma do sozanê xo bîyarê ca. Bes wa vernîya ma de dêsî nêronê û xebatanê ma asteng nêkerê. Nika zî asteng kenê, vanê tedbîrê tasarrufî. Enqere de, Qesre de tasarruf nêkenê, rayîr, awe û resê şarî de tasarruf kenê."

'Ma do her dewe û qeza de xebatanê xo dewam bikê'

Hemşaredare Bucak ke qadê mesûlîyetê Şaredarîya Şaristanê Girdî ard vîrî, wina va: "Ma Gêl qet vîndî nêkerd. Gêl tîya de yo Ma, endamê meclîsê ma, şarê ma, muxtarê ma tîya de yê. Ma do pîya, Gêlo ke texmîn kerdêne ke ma vîndî kerdo, tede xebate û xizmet bikê. Ma şîyî Çêrmuge zî, Gêl zî, Hezro zî. Eşkeno ma wina nêzdî bibê? Ma turbeyî zî, rayîrî zî dî, hewcedarîyî tesbît kerdî. No qadê mesûlîyetê ma yo. Ma do bê ferq projeyan her dewe û qeza de nê xebatanê xo dewam bikê."

Zîyaretanê taxe de Hemşaredara Bucak reyde, Sekreterê Pêroyî Emrullah Gorduk, Hetkarê Mudirê Pêroyî yê DÎSKÎ Serdar Arslan, Serekê Daîreya Resî Temel Cengiz, Serekê Daîreya Viraştişê Rayîrî û Koordînasyonê Binawanî Ozgur Tekîn û endamê meclîsî pîya bîyî.