Rojê Tîyatroyê Cinîyanê Amedî yê 1. ke hetê Tîyatroyê Şaristanî yê Şaredarîya Amedî ya Şaristanê Girdî (DBŞT) ra yeno organîzekerdene, roja xo ya çarine de bi kayê tîyatroyî dewam kerd. Kayê cinîyan o yewkesî 'Yew Cinî Hişyar Bena' ke hetê Koma Hunerê Vînayîşî ya Bogazîçî (BGST) ra yew hîkayeya raştîne ra ameyo adaptekerdene û Aysel Yildirim kay kerdo, Tîyatroyê Şaristanî yê Amedî de ame kaykerdene.

Kay behsê ciwanîye, zewac, talaq û cuya newa ke yew cinî awan kena, keno.

Aysel Yildirim badê kayê di perdeyan va ke nê kayî ke ê 2005î ra nata kay kenê, hîkayeya yew cinîya sinifa mîyanêne ya Îstanbulî ya raştêne senî bîya yew têkoşîn û merkezî ra camêrdî vetene û bi vatişê cinî ardo sahne.

Şîyayîş zehmet o yan mendene?

Kayê 'Temok' (Sis) ke Perwîz Ehmed ke bajarê Seqizê Îranî ra ameyo adaptekerdene, Merkezê Kultur û Kongre yê ÇandAmedî de ame kaykerdene. Temok ke bi hawayêko muzîkal û şîîrî yeno kaykerdene, hîkayeya kesêk yan kesanê ke kotî ra û senî bo wazenê şêrê. Her çiqas tayê çîyî înan nê qerarî ra tepîya anê zî û ge-ge agêrenê û ewnîyenê zî, çîyo tewr muhîm şîyayîş o û kay behsê têkoşînê mabênê şîyayîş û mendişî keno.

'Raştîya xo ma zaf şa yê'

Rojda Acun ke temaşekar a, badê kayî va ke a xebatanê Rojê Tîyatroyê Cinîyan ke Şaredarîya Şaristanê Girdî organîze kerdo, temaşe kena û wina dewam kerd: 'Ma tîya de kayan temaşe kenê ke şîdetê cinîyan, heqê cinîyan û çi heyf ke kiştişê cinîyan û tecawuzî ke roj bi roje zêde benê, înan ser o vindenê. Raştîya xo ma zaf şa yê û ma wazenê ke hîna zaf şarî rê bireso û şarê ma nê derheqî de hîna zaf hişyar bibo.'

'Festîval seba cinîyan zaf weş vîyareno'

Sakîna Jîr ke temaşekar a û kayker a zî va ke a sey mêmane Rojê Tîyatroyê Cinîyanê Amedî Îstanbulî ra ameya û wina qisey kerd: 'Festîval seba ma cinîyan zaf weş vîyareno. Xeylê cayî ra kayê weşî est ê. Ez hêvî kena ke nê rojê tîyatroyî serranê ameyoxan de zî dewam bikerê. Ez sipas kena heme kesê ke kedê înan tede est a.'"