Hemşaredara Şaredarîya Amedî ya Şaristanê Girdî Serra Bucak vera tayînkerdişê qeyyûmanê şaredarîyan reaksîyon mojna û va ke seba bêîstîqrarîye xorî nêbo, wazîfeyê muhîmî kewenê milê hukmatî, odayan, rêxistinanê sivîlan û rayberîyanê herêmkîyan ser.

Bucak beşdarê merasîmê akerdişê awanîya xizmetî ya Odaya Muhasebekarê Serbest û Mişawirê Malî yê Amedî (DSMMMO) ya Taxa Bagcilarî bîye.

Bucak ke merasîm de qisey kerd, sipasîya kesê ke na awanî arda Amed kerd û va "Wa awanîya şima seba Amedî xeyrên bo."

Bucak ehemîyetê weçînayîşî ser o vinderte û wina va: "Ez tîya de vera şima ewro waştişê îradeyî ke nameyê serekê şaredarîyan, hemşaredarê şaredarîyan, endamê meclîsî û weçînayoxanê Hekkarî, Esenyurt, Mêrdîn, Xelfetî û Batmanî rê ameyo kerdene, protesto kena."

'Ma do demokrasî bipawê'

Bucak îfade kerd ke sîstemê weçînayîşî eşkenê bêrê rexnekerdene û wina dewam kerd:

"Ma eşkenê sîstemê weçînayîşî yê Tirkîya rexne bikê, çi weçînayîşê pêroyî çi yê herêmkî, la ma nêşenê coşê weçînayîşanê herêmkîyan rexne bikê. Xususen seba ke şima zanê, herêma ma de 2016 ra nata rejîmê qeyyûmî, rejîmê tayînkerdeyan est o û hukmatêk est o ke naye de îsrar keno. Ma sebebê nê îsrarî fehm nêkenê. Ma dî ke qastê heqî û îradeyî yo ke 2016 de dest pêkerd û nêşinasnayîşê weçînayîşan û tetbîqkerdişê ney eslê xo de çîyêk nêda hukmatî. Çunke şarî 31ê adare 2024 de weçînayîşê herêmkî de înan weçînayîşî de xeneqnayî. La aseno ke cewabê şarî hewl nêameyo fehmkerdene, Anqara ra bes nêameyo eşnawitene, nêameyo dîyene. La reyna zî ma do vera nê tetbîqê antî-demokratîkî ma weçînayeyî, yanî heme parçeyê bajarî, komelê sivîlî, odayî, sendîkayî, kotî weçînayîş est o ma do heta peynî bipawê. Helbet ma do sindoqanê weçînayîşî, weçînayîşan û demokrasî bipawê."

'Ma cuya seypê û azade pawenê'

Bucak va ke mişawirê malî krîzê ekonomîkî yê welatî goreyê meslegê xo weş zanê û wina qisey kerd: "Şima sey mişawirê malî, muhasebekarê serbestî merdimê ke mîyanê heme qatanê komelî, sazgehan û şîrketanê xususîyan de, tewr merkezî de, mitbaxê ekonomîya welat, bajar û şaristananê ma de yê. Coka şima sewbîna cayî ra hîna weş zanê ke ekonomîya ma senîn a. Ma wexto ke ma cuya seypê, azade û demokratîke pawenê, helbet ma bajarê averşîyayeyî, ekonomîya averşîyaye û sistemê perwerdeyî ra bigîre sistemê weşîye heme qonaxanê averşîyayîşî pawenê."

'Hewcedarîya ma bi organîzebîyayîşêko hîna xurt est a'

Bucak dîyar kerd ke ê muxalefetêko pîl ê û wina dewam kerd: "Ma gere hîna zaf organîze bibê û hîna zaf hêzê xo fehm bikê. La ma bawer kenê ke nê darbeyî, nê xaspî, nê îxlalê heqan û nê bêhuqûqîyî do ma hîna zaf bîyarê têhet. Mucadeleyê demokratîk, mucadeleyê heqan ganî her cayê cuye û sazgehan de bibo. La 5 rojî yo şarê ma kuçeyan ra vano 'Çira serekê şaredarîyan ke mi weçînayî bêheqî û bêhuqûqî yenê girewtene?' No heqêko tewr meşru û demokratîk o. La nê heqê ma yê tewr demokratîk û meşruyî yenê tenkîlkerdene. Mucadeleyê heqê demokrasî meydan û kuçeyan de, vera şaredarîyanê ke gasb bîyê de meşru yo, heqê şarî yo tewr bingeyên o."

'Ganî ma heqîqetî vajê'

Bucak ehemîyetê mucadeleyê heqan û azadîyan ser o vinderte û wina qedêna: "Na mana de xizmetêko zaf muhîm keweno milê hukmatî, odayan, heme parçeyanê sivîlan û rayberîyanê herêmkîyan. Wa hukmat dest bido û seba ke şaredarîyê weçînayeyan bieşkê bajaranê xo îdare bikê, wa polîtîkayêka aqilane bimojno. Eke hewna wina dewam biko do kaos û bîndestîye xorî bo û hewayêko bêewle do hîna zaf bêewle bo. Ez nêwazena bi rojevêko xirab qisey bikerî la ganî ma heqîqetî vajê. Ez wazena tîya ra vaja ke demokrasîya herêmkî, organîzebîyayîşê demokratîk û weçînayîşî çiqas muhîm ê û nê çî ameyoxê Tirkîya ser o senî tesîr kenê."

Badê qiseykerdişî awanîya xizmetî yê DSMMMO’yî ameye akerdene.

Sekreterê Pêroyî yê Şaredarîya Şaristanê Girdî Emrullah Gorduk, endamê meclîsî, Serekê Pêroyî yê TURMOB’î Emre Kartaloglu, Serekê DSMMMO’î Şîyar Bozhan, Serekê YIK’î yê Amedsporî Burç Baysal û xeylê temsîlkarê odayan beşdarê merasîmê akerdişî bîyî.