Şaredarîya Amedî ya Şaristanê Girdî seba ke warê xebata cinîyan hîra biko û piştî bido xurtkerdişê seypêyîya cinsîyetê komelkî, Projeya Perwerdeyê Ehlîyetê Şoferîya Otobuse yê Cinîyan ke dest pê kerdo, do Kanûne de bi 28 cinîyan dest pê biko.

Serekîya Daîreya Xizmetê Cinî û Keyeyî û Serekîya Daîreya Resî Projeyê Perwerdeyê Ehlîyetê Şoferîya Otobuse yê Cinîyan aver berd. Proje bi hedefê hem bi perwerdedayîşê şoferanê cinîyan wareyê xebatê neweyî cinîyan rê akerê hem zî piştî bidê seypêyîya cinsîyetê komelkî awan bîy.

Proje de 258 cinî ke mîyanê 24-35 serran de yê û Amed de ciwîyenê, muraceat kerdî. Badê tehlîlan 28 cinî heqê beşdarîya Projeya Perwerdeyê Ehlîyetê Şoferîya Otobusî bi dest vist.

Proje do Kanûne de dest pê biko

Proje ke do Kanûne de dest pê biko, tede do bi hemkarîya kursanê şoferîye 28 namzedanê şoferîya otobuse yê cinîyan rê perwerdeyê teorîk, teknîk, pratîk û saha bêrê dayene.

Badê ke prosesê girewtişê ehlîyetê cinîyan qedîya, hetê Şaredarîya Amedî ya Şaristanê Girdî ra yew aşme û pêro pîya 6 saetî perwerdeyêko îlawe yo pratîk-saha zî do bêro dayene.

Mesrefî do hetê şaredarîye ra bêrê dayene

Mesrefê perwerdeyê kursî û belgeyê şoferîye ke proje de do bibê, do hetê Şaredarîya Amedî ya Şaristanê Girdî ra bêrê dayene.