Mudirîya Pêroyî ya DÎSKÎ ya Şaredarîya Amedî ya Şaristanê Girdî derheqê nêeştişê girşûgalî yê xetê kanalîzasyon û awa varanî de îqazî kerdî.

Mudirîya Pêroyî ya DÎSKÎ, awa şimitişî ra teber, seba ke binawanî zî bêproblem bixebitîyo xebatanê xo dewam kena.

Mudirîya Pêroyî ya DÎSKÎ, seba ke tora 1 mîlyon û 200 hezar metre kanalîzasyon û 350 hezar metre yê awa varanî wazîfeyê xo bêproblem bîyaro ca, venga şarî da ke haydar bo. Mudirîya Pêroyî ya DÎSKÎ îqaz kerd ke şar xetê kanalîzasyon û awa varanî rê eşteyê xo meerzê.

Vengdayîşê hişyarîye

Mudirê Şefîya Xebitnayîşê Tora Awa Lêmine yê DÎSKÎ Veysî Aktaşî va ke seba ke xetê awa lêmine û awa varanî yê bajarî bi hawayêko weş wazîfeyê xo bîyarê ca, ganî her kes wazîfeyê xo bîyaro ca.

Aktaşî dîyar kerd ke seba ke xetê kanalîzasyon û yê awa varanî bi hawayêko weş wazîfeyê xo bîyarê ca, wazîfeyî kewenê milê şarî zî û wina dewam kerd:

'Ma vînenê ke destmalê hîtî, bêzê domanan, sungerê firaqan, şuşeyê cam û teneke, leteyê qumaşî, kerrayî, qum, rûnê veşateyî, zibilê heywanan, heta lastîkê erebeyan, kincî, qutîyê konserveyî sey materyalî ke awe de nêhelîyenê yan zî vernîya herikîyayîşê awe gênê, şar erzeno xetê kanalîzasyon û awa varanî û ma eşkenê hezaran fotografê ney bimojnê. Nê materyalî ke yenê eştiş xetan, vernîya herikîyayîşê awe gênê û bi herikîyayîşêko turbulensî benê sebebê girêdayîşê xetan, seraşîyayîşê rogaran û tewr muhîm sebebê tepiştişê awa keyeyan û cayê xebatan ê ke kotê înan nizm o, reyna zî zerar danê sistemanê ma yê agoznayîşî. Ma wazenê şarê ma yo erjaye derheqê nêeştişê girşûgalî xetê kanalîzasyon û yê awa varanî de û pawitişê nê xetan de û tewr muhîm seba ke herikîyayîşê lamînerî bêro temînkerdene, hişyarîye bimojno û hesas bo.'

'Binawanîyo weş vernîya lêminbîyayîşê Royê Dîcle gêno'

Aktaşî qeyd kerd ke xebitîyayîşê weşî yê binawanî vernîya lêminbîyayîşê Royê Dîcle zî gêno û va 'Seba bajarê ma ke nifûsê merkezî nêzdîyê 1.5 mîlyon o, bi teknolojîyo berz û bi tora 1 mîlyon û 200 hezar metre kanalîzasyon û 350 hezar metre awa varanî ke tewr weş ameyo dizaynkerdene, tesîsanê ma yê agoznayîşî awa lêmine de awa lêmine tewr weş kom kenê, standardê dinya de kalîte aritte kenê û erzîyêna Royê Dîcle ser û reyna piştî dano cuya ekolojîke.'

'Ma bi teknolojîyo berz tora xetan pawenê’

Aktaşî îfade kerd ke ê torê ke ameyê viraştene tewr weş pawenê û pakkerdişê dewr bi dewr û tamîrî bi dîqqet yenê kerdene û va ke problemê xetan bi sistemanê vînayîşê qalanî yê ke teknolojîyo berz, yenê tespîtkerdene û xebatê başkerdişî û newekerdişî yê lazimî yenê kerdene.