Hemşaredara Şaredarîya Şaristanê Girdî Serra Bucak wasitaya Pakkerdişê Rayîran ke bi qerarê Meclîsî ameya wezîfedarkerdene, teslîmê Şaredarîya Samandagî ya Hatayî ke erdlerzanê 6ê Sibate 2023î de zerarêko giran dîyo, kerde.

Meclîsê Şaredarîya Amedî ya Şaristanê Girdî, kombîyayîşê adetî yê teşrina verêne de teklîfo ke seba Qezaya Samandagî ya Hatayî ke erdlerzanê Mereşî de zerarêko giran dîyo û nifûsê ey 124 hezarî ra vejîyayo 200 hezaran, mişewre kerd. Meclîsî waştişê tayînkerdişê 4 serran yê yew wasitaya Pakkerdişê Rayîran a Şaredarîya Şaristanê Girdî ke Şaredarîya Samandagî do kuçe û cadeyanê xo de bişuxulno, qebul kerd.

Hemşaredara Şaredarîya Amedî ya Şaristanê Girdî Serra Bucak ke şîye Qezaya Samandagî ya Hatayî, hetê Serekê Şaredarîya Samandagî Emrah Karaçayî ra ame mêmankerdene. Badê mêmandarîye Hemşaredare Bucak û kesê ke aye reyde bîy, şîyî awanîya xizmetî ya şaredarîye.

Hemşaredare Bucak: Hesretê ma herêmêka ke tede demokrasîya herêmkî aver şîya, est a

Hemşeredare Bucak ke zîyaretî de qisey kerd, qeyd kerd ke ê vera fehmê ke nêwazeno fehm biko ke weçînayeyî îradeyê şarî yê û wina va: 'Helbet, her ca de, Samandagî ra heta Amedî û uca ra Batman û Esenyurtî, hesretê ma herêmêka ke tede weçînayeyî wazîfeyê xo dewam kenê, demokrasîya herêmkî û beşdarîye dewam kena û aver şona, est a. Ma hêvî kenê ke ma do naye pîya awan bikê. Ma do pîya bi hawayêko hîna bihêz rayîrê xo ra şêrê.'

'Çîyo muhîm pîyabîyayîşê şarê ma yo'

Bucak dîyar kerd ke a bi dawetê xebata cinîyan a Meclîsê Cinîyan ê DEM Partî yê Hatayî ameya bajar û wina dewam kerd: 'Ma bi na wesîle şima zî zîyaret kerd û kamyonê çopî ke demêko derg o rojeva ma de yo û ma waşt ma şima rê dîyarî bikê, ard. Wa xeyrên bo, wa kuçeyî rind bêrê pakkerdene. Biney erey mend la dima ke ma şaredarîye qeyyûmî ra tepîya girewte, ma şayîya xo bikê. Ma wazenê ke dostîya ma, hemkarîya ma hem zî manewî û hem zî bi xebatanê winasîyan dewam biko. Çîyo muhîm pîyabîyayîşê şarê ma yo, dostîya înan a, pêgirewtişê destanê înan o, eşkayîşê hemkarîye yo, hem kulturî hem fikrî hem zî hetê xebatanê şaredarîye ra eşkayîşê têhetameyîşî yo.'

Karaçay: Pîyabîyayîşê şima seba ma zaf erjîyaye yo

Serekê Şaredarîya Samandagî Emrah Karaçayî zî va ke badê ke înan 31ê Adare de weçînayîşî kerd, tayê şaredarîyan, wezaretan û dezgeyanê dewlete heme wasitayê xo peyser girewtî û 3 aşmî çop û gemarî reyde mucadele kerd. Karaçayî îfade kerd ke seba naye înan Şaredarîya Amedî ya Şaristanê Girdî ra kamyonê çopî waşt û wina va: 'Badê hetkarîyanê ke weçînîyayî ra dima ameyî birnayene, kamyonê çopî û pakîye zaf muhîm bî. Seba ke ma derdanê Hatay û Samandagî derman bikê, no seba şima belkî çîyêko qij bo la seba ma çîyêko zaf gird o, seba ma zaf erjîyaye yo. Pîyabîyaîşê şima, piştîdayîşê şima seba ma zaf erjîyaye yo. Eke şima Amed ra tenê selamê xo zî bişawitêne ma rê zaf erjîyaye bî, şima ameyî tîya, ma zaf şa bîyî.'

Karaçayî derheqê tayînkerdişê qeyyûman de zî va 'Ma xespê îradeyê şarî qebul nêkenê.'

Badê qiseykerdişî Serekê Şaredarîya Samandagî Karaçayî ke qamişê Samandagî ra virazîyayo û mahsulê herêmî ke hetê Kooperatîfê Cinîyanê Samandagî ra ameyê viraştene, dîyarîyê Hemşaredare Bucak kerdî.

Wasita ameye teslîmkerdene

Badê pêvînayîşî Wasitaya Arêkerdişê Çopî hetê Hemşeredare Bucak ra Şaredarîya Samandagî rê ameye teslîmkerdene.

Zîyaretê Şaredarîya Samandagî de Hetkarê Sekreterê Pêroyî yê Şaredarîya Şaristanê Girdî Reşat Bakan, Hemverfeka Meclîsî Emîne Akin, serekê daîreyan, Hemserekê DEM Partî yê Wîlayetê Hatayî Naîm Ozbek û Serekê Wîlayetê Hatayî yê Partîya Karkeranê Tirkîya (TÎP) Hasan Yilmaz zî ca girewt.