Hemşaredarê Şaredarîya Amedî ya Şaristanê Girdî Dogan Hatunî ke akerdişê Fuarê Gurmeyî yê Mezopotamya û Tehmanê Herêmkîyan de qisey kerd, dîyar kerd ke fuar seba şinasnayîşê bajarî zaf muhîm o.

Akerdişê Fuarê Mezopotamya Gurme û Tehmanê Herêmkîyan ke hetê Odaya Tîcaret û Sanayî ya Amedî (DTSO) û Mezopotamya Fuarî ra ameyo organîzekerdene û Şaredarîya Şaristanê Girdî piştî dayo, Hemşaredarê Şaredarîya Şaristanê Girdî Dogan Hatunî ke merasîmê akerdişî de qisey kerd, dîyar kerd ke fuar hetê şinasnayîşê bajarî ra zaf muhîm o û wina va: 'Mezopotamya welatêko muhîm o, di royê aye yê muhîmî est ê; yew Firat o, yew Dîcle yo. Tarîxê dinya ra heta ewro awa nê royan nêvinderta. Herra aye ya bereketin a, coka bereketê aye resayo heme dinya. Mezopotamya de Rayîrê Herîrî û Rayîrê Baharat bî û ewro zî nê welatan de dewam keno. Amed eynî wext de paytextîya Mezopotamya zî kena. Şaristanêko pîroz o. Genim reya verêne Mezopotamya de ameyo ramitene. Mezopotamya wayîrê tarîxêko 12 hezar serran a û xeylê medenîyetî tede ciwîyayê. 12 hezar serran de 33 medenîyetî bi awe û herra xo resayê ewro. Ganî ma zî wayîr vejîyê nê mîrasê qedîmî û ma hezar serranê ameyoxan rê biresne. Ma do sey Şaredarîya Şaristanê Girdî rayberîya nê kulturî zî bikê.'

'Nê welatan mîrasêko zaf verdayo ma rê'

Hemşaredar Hatunî îfade kerd ke nê welatan mîrasêko zaf verdayo û wina qisey kerd: 'Ma wazenê ke ma bi kultur, ziwan, huner û tarîxê hezar serran gedeyanê xo pîl bikê. Kesî nêeşka ziwan, huner û kulturê ma destê ma ra bigîro, nêeşkeno zî. Hewceyîya naye çin a biewnê Odaya ma ya Tîcaret û Sanayî 59 bajarî ardê têhet û her kes eşkeno mahsulanê herra xo û mahsulanê ke herêma xo de ramito, pîya rono. Ma çira nêeşkenê nê welatan de di ziwanî, di hunerî, des hunerî, des kulturî pîya biciwîyê. Nê kulturî ma pîl kerdî. Ma eşkenê fehm bikê. Ma bi tolerans şênê qebul bikê dewlemendîya cîyaye û zafîye, la waştişê ma o yo ke ma zî wina bêrê qebulkerdene. Ganî her kes nê çî hazim biko. Ez reyna sipas kena endamê heyetê îdareyî û heme xebatkarê Odaya Tîcaretî rê ke winasî yew fuar organîze kerdo. Bi hêvîya ke ma pîya bihewiyê ameyoxê nê welatî teslîmê odayanê tarîyan nêbo."

Hemşaredar Hatun standî geyrayî

Badê akerdişî Hemşeredar Hatun û kesê ke ey reyde bîyî, standê ke fuarî de akerde yê geyrayî û berpirsîyaranê şîrketan reyde sohbet kerd.

DBB’yî fuar de stand akerd

Fuarî de ke Şaredarîya Amedî ya Şaristanê Girdî zî stand akerdo, 170 şîrketî 59 bajaran ra beşdar bîyî. Fuar do 6 rojî akerde bimano.