Hemşaredara Şaredarîya Amedî ya Şaristanê Girdî Serra Bucak ke beşdarê têhetameyîşê cinîyan bîye ke Qezaya Defne ya Hatayî de organîze bî, bale ant Roja Têkoşînê Mîyanneteweyî ya Vera Şîdetê Cinîyan a 25ê Teşrîna Peyêne ser o û dîyar kerd ke ganî têkoşîno ke vera şîdetî yeno dayene, bêro girdkerdene.

Meclîsê Cinîyan ê DEM Partî, çarçewaya Roja Têkoşînê Mîyanneteweyî ya Vera Şîdetê Cinîyan a 25ê Teşrîna Peyêne de seba cinîyanê ke konteyner û çadiranê Qezaya Defne ya Hatayî de ciwîyenê û erdlerz dîyo, xebata "Têhetameyîşê Cinîyan" organîze kerd. Têhetameyîşî de ke merkezê koordînasyonî yê KESK’î de virazîya, Hemşaredara Şaredarîya Amedî ya Şaristanê Girdî Serra Bucak, Verfeka Meclîsê Cinîyan a DEM Partî Halîde Turkoglu û cinî beşdar bîy.

Hemşaredare Bucak ke têhetameyîşî de qisey kerd, silam da cinîyan û ard vîr ke erdlerzanê 6ê Sibate 2023î ser ra di serrî vîyartê. Bucak îfade kerd ke ê do heme zehmetîyan reyde cuyêka newîye awan bikerê û wina va: "Wexto ke koçî, herbî û xirabîyî yenê ciwîyayene, tewr zaf cinî marûz manenê, tewr zêde hewcedarîyê cinîyan nêyenê dîyene, tewr zêde waştişê cinîyan nêyenê dîyene. Çunke çi heyf ke fehmê pederşahî viraştişê dewletan û dewletanê neteweyan de est o. Eynî tewir cinî, rayberîyê herêmkî ke tewr zêde do têkilî ronê û tewr zêde îstîqamet bidê, tede dûr ameyê fînayene. Ma cinî ke qadê rayberîyanê herêmkîyan de têkoşînê estbîyayîşî danê. Badê ke ma belaya sey erdlerzî û belayê bîni ciwîyayî, problemê ke hîna zêde bîyê, vejîyayî vernîya ma. Mixabin ma herêmêk de yê ke problemê ma hîna zêde bîyê."

'Koçî ameyî Amed'

Hemşaredare Bucak dîyar kerd ke badê erdlerzî koçan Hatay, Semsur û Meletî ra dest pêkerd ameyî Amed û va ke ê ge-ge cinî û keyeyanê ke hema konteyneran de ciwîyenê, înan reyde yenê têhet.

'Ma şaristananê bêemnîyetan de ciwîyenê'

Bucak ke bale ant rolê rayberîyanê herêmkîyan ser ke şaristanan kenê emnîyetin, wina qisey kerd: "Ma herêmêka bêemnîyete de ciwîyenê. Tîya de rolê rayberîyanê herêmkîyan, mîsyon û wazîfeyê înan vejîno meydan. Ma do se bikê ke ma şaristananê xo emnîyetin bikê. Ma wexto ke behsê emnîyetî kenê, behsê starbîyayîşî kenê. Ganî însanî perwerde, weşî, berhemî û averşîyayîşê şaristanî de ca bigîrê û eynî wext warêko emnîyetin de biciwîyê. Ma vînenê ke kuçeyî hîna zaf cinîyan rê bêemnîyet ê."

Hemşeredare Bucak ke bale ant muhîmîya xebatanê îstîxdamê cinîyan, têkoşînê vera şîdetî, perwerde û hîsîyarîye ser, dîyar kerd ke çi heyf ke Îstanbul ra heta Amed, Dewa Tawşantepe ya Baglarî ra heta Wanî şaristanê tewr bêemnîyetan de ciwîyenê.

'Fotografê şîdetî zaf cîya yê'

Bucak qeyd kerd ke aye ewro eslê xo de waştêne çîyanê positîfan ser o qisey bikera û wina dewam kerd: "Vernîya ma de Roja Têkoşînê Vera Şîdetê Cinîyan a 25ê Teşrîna Peyêne est a. Ma mîyanê aşmêk de yê ke tede ma şîdetê cinîyan protesto kenê, vera şîdetê cinîyan her tewir têkoşînî pawenê, mekanîzmayanê cîya-cîyayanê têkoşînê vera şîdetê cinîyan ser o qisey kenê û ma do xebatanê cîya-cîyayan bikerê. Ma do meseleyê şîdetî ser o qisey bikê. Ganî ma vera şîdetî têkoşîn bidê, ganî ma her warî de şîdetî munaqeşe bikê. Ganî ma hem şîdeto ke sistemê dewleta pederşahî ra yeno û hem zî şîdeto ke naye ra vejîyeno û keyeyan de yeno tetbîqkerdene, ser o qisey bikê. Ma cinîyê Tirkîya, cinîyê tirk, kurd, laz û çerkez, ma eşkenê bêrê têhet. Ma eşkenê problemanê cinîyan ser o qisey bikê. Ma eşkenê têkoşînê xo yê vera şîdetê cinîyan ser o qisey bikê la ganî ma nê têkoşînî hîna gird bikê, ganî ma hîna organîze bêrê têhet. Çunke şîdet nêvindeno, bi giranîye dewam keno. Nê şîdetî de fotografê zaf cîyayî estê. Ma warê xebate de, sazgehê dewlete de marûzê mobîngî manenê, heta warê ke ma tede weçînîyayê.