Hemşaredarê Şaredarîya Amedî ya Şaristanê Girdî Dogan Hatun kongreya awarte ya Amedsporî de qisey kerd û dîyar kerd ke ê do piştî bidê Amedsporî.

Kongreya Awarte ya Amedsporî Merkezê Kultur û Kongre yê ÇandAmedî de virazîya. Hemşaredarê Şaredarîya Amedî ya Şaristanê Girdî Dogan Hatun, Serekê Klubê Amedsporî Azîz Elaldî, endamê heyetê rayberîye, temsîlkarê rêxistinanê sivîlan û temaşekerî beşdarê kongre bîyî. Hemşaredar Hatun wexto ke dekewte salon, hetê temaşekeran ra bi çepikan ame mêmankerdene.

Vengdayîşî de ke badê qiseykerdişan virazîya, Burç Baysal Serekîya Klubê Amedsporî rê ame weçînayene. Tede endamê komîte, Komîteya Mişewreyê Berzî (YIK) ya 40 kesî zî ameye tesbîtkerdene. Rêza verêne de Hemşaredara Şaredarîya Amedî ya Şaristanê Girdî Serra Bucak bîye.

Hemşaredar Hatun: Amedspor nasnameyê ma yo

Hemşaredar Dogan Hatunî, badê tayînbîyayîşê rayberîya newîye, sipasê heme kesê ke awankerdişê Amedsporî ra heta ewro keda xo daya Amedsporî kerd û va: "Raştîya nê warî a ya ke ge aver şono ge apey şono. Helbet zerrî her tim wazena ke aver şêro. Ma wazenê ke şarê ma û bajarê ma her warî de aver şêro, ge-ge tayê çî destê merdimî ra nêyeno. Tayê çî bextî ra nîyê, wayîrvejîyayîşî ra yê. Amedspor sey nasnameyê ma yo. Senî ke ziwanê ma nasnameyê ma yo, kultur û hunerê ma nasnameyê ma yo, Amedspor zî nasnameyê ma yo. Heqê ma çin o ke ma tira dûrî bikewê. Ma soz danê ke ma do Amedsporî bipawê. Embazanê ma seba ke ma biresê na lîge zaf kede daya, la ganî ma bifikirîyê ka ma seba na lîge çi amadekarî kerdo. Ganî ma kêmanîya xo bivînê."

'Stadê Şilbê dayo Dîyarbekirsporî'

Hemşaredar Hatunî dîyar kerd ke Şaredarîya Şaristanê Girdî eşkena çareyê problemanê Amedsporî de rayberîye biko û wina va: "8 serran xirabîyêko gird xo dima verdayo. Ma nika xo amade kenê ke ma seba xebatanê ameyoxî bingehêk ronê. Nika xebere ameya ke Stadê Şilbê dayo Dîyarbekirsporî. O muhîm nîyo. Ma tîya ra venga înan danê; Çîyo ke şima ma ra gênê bidê ma, ma soz danê, çi xizmet lazim bo ma do bikê. Bajar bajarê ma yo, nasnameye nasnameyê ma yo, herre herra ma ya. Ma zanê ke şima nêeşkenê nê bajarî bi xo îdare bikerê. Bajarêko qedîm o û tarîxê ey 12 hezar serrî yo. Zere ra zî tayê boyê xirabî yenê; ma boyê xirabî zere de qebul nêkenê. Ma eşkenê heme problemanê taximê rê çareyan bivînê."

'Ma ameyî ma reyna nêşonê'

Hatunî îşaret kerd ke spor tena futbol nîyo û va ke gedeyî û ciwanî wazenê ke şubeyê sporî yê bînan de xo aver berê û seba naye zî binawanî amade kenê. Hatunî îşaret kerd ke ganî Amedspor şubeyanê bînan ê sporî de zî aver şêro û va: "Çira tena futbol? Zaf beşê sporî est ê. Ma turnuvaya tenîsî akerd û zaf keyf kerd. Çira Amedspor tena futbol kay keno? Çira şubeyanê bînan de çin o? Seba temaşekeranê Amedsporî; Şaredarî yê şima ya. Ma do çi destê ma ra bêro bikê. Ma tîya de yê; Ma ameyî ma reyna nêşonê.