Şaredarîya Amedî ya Şaristanê Girdî, bi hemkarîya GABBî seba personelanê ke beşanê res, zabita û têkilîyanê şarî de xebitîyenê, perwerdeyê "Îdarekerdişê Hêrsî" da.

Serekîya Daîreya Çimeyê Însanî û Perwerdeyî, bi hemkarîya Yewîya Şaredarîyanê Herêma Başûrê Rojhelatê Anatolyayî (GABB), seba personelanê ke beşanê res, zabita û têkilîyanê şarî yê Şaredarîya Şaristanê Girdî de xebitîyenê, programêko perwerdeyî organîze kerd. Perwerdeyê "Îdarekerdişê Hêrsî" yo ke di rojan rameno, Merkezê Kulturî yê Elî Emîrî yê Şaredarîya Şaristanê Girdî de dest pêkerd.

Akerdişê programî de Serekê Daîreya Resî Temel Cengiz û Mudirê Şûbeyê Çimeyê Însanî û Perwerdeyî yê GABBî Abdullah Karahanî qisey kerd û bale ante muhîmîya têkilîya şarî ser o.

Psîkolog Ugur Çagan Alakuştekinî ke perwerdeyê "Îdarekerdişê Hêrsî" da, sere de şoforê otobusî, seba heme personelanê ke şarî reyde têkilîye de yê, derheqê "Psîkoteknîk, Kontrolkerdişê Hêrsî, Qiseykerdişê Şarî û Tevger" de perwerde da.

Alakuştekinî bale ante ke hêrs zî sey heme hîsanê bînan, eke bi hawayêko munasib bêro îfadekerdiş hîsêko însanî û normal o û wina va: "Hêrs, eke bi hawayêko munasib bêro îfadekerdiş, hîsêko zaf weş û tebîî yo. La eke nêro kontrolkerdiş û bibo yew çîyo xirabin, eşkeno cuya wendişî û karî de, têkilîyanê şexsî de û kalîteya cuye de bibo sebebê probleman. Hêrs û heridîyayîş zafêr pîya yenê eleqedarkerdiş û pîya yenê nirxnayene. Heridîyayîş yew tevger o; hêrs yew hîs o. Hêrs ge-ge beno sebebê heridîyayîşî, la zafêr destpêkê tevgerê heridîyayîşî nîyo."

Alakuştekinî derheqê kontrolkerdişê hêrsî de malumat da personelan.