Hemşaredarê Şaredarîya Amedî ya Şaristanê Girdî Serra Bucak û Dogan Hatun, beşdarê Kombîyayîşê Meclîsê Asayî yê Teşrîna Peyêne yê DTSO’yî  bîyî û derheqê problemanê bajarî û xizmetanê ke roja ke weçînîyayîşî ra heta ewro de qisey kerd. Hemşaredaran va ke ê sozê xo ra peyser nêşonê û do bajarî pîya îdare bikerê.

Hemşaredarê Şaredarîya Şaristanê Girdî Serra Bucak û Dogan Hatun, beşdarê Kombîyayîşê Meclîsê Asayî yê Teşrîna Peyêne yê Odaya Bazirganî ya Amedî (DTSO) bîyî.

Hemşaredar Bucak û Hatun, hetê Serekê DTSO’yî  Mehmet Kaya, Sereka Meclîsê DTSO’yî  Nevîn Îl, Serekê Heyetê Mişawirîya Berze Burç Baysal, Serekê Meclîsê Karî Mustafa Vural, endamê Meclîsê DTSO’yî  û Meclîsê Cinîyanê Karkerdoxan ra verê binaya DTSO’yî  de ameyî qebulkerdene.

Verê kombîyayîşî, werdê herêmî yê Amedî ke Kooperatîfa Cinîyan a Keyma viraştê, hemşaredaran û beşdaran rê ameyî pêşkêşkerdene.

'Şaredarîya Şaristanê Girdî û DTSO eşkenê pîya bixebitîyê'

Akerdişê kombîyayîşî de ke zaf temsîlkarê rêxistinanê komelê sivîlî û endamê DTSO’yî  beşdar bîyî, Sereka Meclîsê DTSO’yî  Nevîn Îl qisey kerd. Dima Serekê DTSO’yî  Mehmet Kaya yew pêşkêşî kerd û derheqê qadanê xebata muştereke ya DTSO û şaredarîye de pêşnîyazî kerdî. Kayayî va ke Şaredarîya Şaristanê Girdî û DTSO eşkenê nê babetan de pîya bixebitîyê: "Viraştişê lîsteya vayîye û kontrolkerdişê aye, ciwîyayîş û girdkerdişê zincîrê marketanê herêmî, kontrolkerdişê projeyê kolonanê kargehanê binê banan, xebatê îmarî yê qezayan, qeydkerdişê cografîk û tescîlan, vetişê xerîtaya bajarî (feqîrî, qadê xebate, xebatkaran ûsn.), îstîhdam seba keyeyanê feqîran".

Badê ke madeyê rojeva kombîyayîşê meclîsî ameyî îlankerdene, Hemşaredare Bucak qisey kerd.

Hemşaredare Bucak: Wazenê bajarê ma bi polîtîkayanê sîstematîkan tepîşte bimano

Bucak behsê muhîmîya tarîxî ya Amedî kerd û bale ant muhîmîya sosyo-polîtîka bajarî ser ke rayîrê bazirganîye ra vîyareno. Bucak ard vîrê şarî ke Amed eyni wext de paytextê verên yê kultur û hunerî yo û wina va: "No bajaro qedîm bi polîtîkaya dewlete ya sîstematîke ya seserrîye wazenê ke tepîşte bimano. No cehdkerdiş hema zî dewam keno. Ez vana cehdkerdiş, çunke aslê xo de ser nêkewenê. La îsrar kenê. No cehdkerdiş bi xo heme qadan de ma heme rê zaf enerjî vîndî keno. Çi heyf ke yew fikro wina est o ke nê polîtîkayanê sîstematîkan ra çare paweno. No fikir çi heyf ke potansîyelê averşîyayîşê bajaranê ma, potansîyelê parekerdişê nê averşîyayîşî şarî reyde û potansîyelê şawitişê çimeyanê ma cayanê raştan zî ma dest ra gêno. Demê qeyyûman de bajarê ma de yew proseso ke ma vajê sermayegozarî kerdo, çin o."

'Ma zaf bêqaydeyî tesbît kerdî'

Bucak behsê tahrîbatê ke qeyyûmî viraştî, kerd û wina va: "299 mîlyonî ke ganî şarî rê biameyêne xerckerdene, bi modelê 'viraştene-dayene'yî ke modelêko mêtînger o, butçeyê şarî ra ameyo xerckerdene. Malê şarî bêqanûn ameyê întîqalkerdene. Ma ke ameyî, ma hem lîsteyê 'viraştene-dayene' hem zî dosyayanê întîqalkerdişî ra ewnîyayî. Ma zaf bêqaydeyî tesbît kerdî. Waştişê ma yê mufetîşî ke seba bêqaydeyîyanê demê înan o, ma cewabê 'Ma demê qeyyûmî tedqîq nêkenê' girewt."

'Hêzê ma est o ke ma pîya enqazî wedarnê'

Hemşaredare Bucak bale ant tayê xizmetanê ke 8 aşman de arde meydan û wina dewam kerd: "Ma 3 hezar û 602 wendekaran rê destekê perwerdeyî da. JÎNKART resna 7 hezaran ra vêşêr cinîyan, aşxaneyê şarî, destekê sosyalî, ma eşkayî nînan seba neseypêyîya ekonomîke û feqîrîya xorîne bikerê. Ma kartê hetkarîya sosyale viraştî. Bê nê destekan nêbeno la ma zî munaqeşe kenê ke ma eşkenê demêkê dergî de se bikê. Tewr asan o ke merdim hetkarî bikero, ma eşkenê têkilîya muhtacîye orte ra wedarnê û ma eşkenê pîya enqazê maddî yê 8 serran wedarnê."

Hemşaredar Hatun: 'Ma tahrîbatî demêko kilm de ant pêser'

Hemşaredar Dogan Hatunî zî va ke roja ke weçînîyayîşî ra heta ewro 7/24 xebitîyayê û bi nê eforî dewam kenê. Hatunî dîyar kerd ke înan tahrîbatî demêko kilm de anto pêser û wina va: "Gama ke yew sazgehî de sazgehbîyayîş nêmano, a sazgehe nêeşkena xîzmet pêşkêş bikero. Coka ma verê cû cehd kerd ke sazgehbîyayîşî temîn bikê. Problemê nê bajarî, ê kesî ke tîya de ciwîyenê do çareser bikê. Bi tabîatîkerdişê fikran û rexneyanê raştan problemî eşkenê bêrê çareserkerdene."

'Ma do merkezê îtfaîyeyî yê neweyî awan bikê'

Hatunî bale ant kêmanîya îtfaîye ser o ke DTSO’yî  ard ziwan û va: "Îstasyono ke est o bes nîyo. Ma do Oglaklî de û vera Tekstîl OSB de cayêk awan bikê. Ma do herêma Teknocentî û cayanê dewan de zî merkezê îtfaîyeyî awan bikê."

'Ma sozê xo peyser nêgênê’

Hatunî va ke badê erdlerzî 17 qezayan de bi pêroyî yew awanîbîyayîşo ke planê îmarî têmîyan keno ameyo meydan û qiseyê xo wina qedênayî: "Binawanî, kanalîzasyon, awa şimitişî bîyê problemêko kronîk. Qezayan de xebatê revîzyonê îmarî dest pêkerd la ma xebatêk dest pêkerd ke îmarê bajarî reyna bîyaro nîzamo verên. Awanîyê xoserî ewro problem nêasenê la demêko nêzdî de do bibê kangren. Ganî ma naye heme raye rê îlan bikê û pîya bixebitîyê. Ma sozê xo ra peyser nêşonê, ma do nê bajarî pîya îdare bikê."

Peynîya kombîyayîşî de fikr û pêşnîyazê grûbanê meslekan ameyî girewtene û îstîşare ame kerdene.

Kombîyayîşî de Sekreterê Pêroyî Emrullah Gorduk û Hetkara Sekreterê Pêroyî Zerrîn Turk hemşaredaran reyde bîyî.