Şaredarîya Amedî ya Şaristanê Girdî, çarçewaya kampanyaya pakîye de rayîranê serekeyanê bajarî ser o 4 hezar sitilê çopî ronana.

Serekîya Daîreya Pawîtişê Derûdorî û Kontrolî, xebatanê xo dewam kena ke kampanyaya pakîye ya ke bi sloganê "Ez Amedî ra hes kena, lêmin nêkena" 5ê Hezîrane Roja Derûdorî ya Dinya de dest pêkerdbî.

Ekîban, cade û bulwaranê bajarî de cayanê ke sitilê çopî tede kêmî yê, şikîyayê yan zî verê cû nêameybî ronayene, sitilê çopî ronayî. Bi taybetî rayîranê qalabalixan de  heme sitilê çopî ke bulwaran de yê, bi yê neweyan yenê bedilnayene.

'Ma bajarêko zaf lêmin girewt'

Hetkarê Sekreterê Pêroyî yê Şaredarîya Şaristanê Girdî Reşat Bakanî derheqê xebatan de ke yenê kerdene malumat da û va ke seba viraştişê bajarêko pak, ê bi heme cehdê xo xebatanê pakîye ser o xebitîyenê. Bakanî va ke înan bi ruhêko seferberî dest bi xebatan kerdo û wina dewam kerd: "Ma ke îdare girewt, ma bi raştî bajarêko zaf lêmin girewt. Zaf lêmin bî û seba ke na lêminî ortey ra wedarê, seba ke Amedêko pak, bajarêko pak virazê, ma bi heme cehdê xo xebatanê pakîye ser o xebitîyayî. Na çarçewa de seke şima pêro zanê, ma 5ê Hezîrane Roja Derûdorî ya Dinya de yew kampanyaya pakîye dest pêkerd ke eşkena heme Amedî rê xîtab bikera. Ma bi ruhêko seferberî dest pêkerd. Coka ma çarçewaya kampanyaya pakîye ke ma dest pêkerdbî, hem seba viraştişê fehmêko gird, hem seba viraştişê hesasîyetî hem zî seba viraştişê kulturî, ma yew xebata cidî kerde."

'Ma yew heyetê koordînasyonê pakîye û zabita viraşt'

Bakanî va ke seba viraştişê bajarêko pak gamê cidî ameyê eştene û wina dewam kerd: "Nînan ra vêşêr ma yew heyetê koordînasyonê pakîye û zabita viraşt. Xebatê ke ma kerdî, ma heme şaredarîyanê qezayan, şaredarîyanê qezayanê merkezî reyde na xebate sewîyeyê tewr berzî de tepişt. Her kes cayê xo yê mesulîyetî de gamanê cidîyan erzeno. Coka ma hem maketî xebitnayî, medyaya sosyale xebitnaye, billboardî xebitnayî, flamayî xebitnayî û sewbîna sînyalîzasyonanê xo de sloganê ‘Çop Meerze’ xebitnayî. Ma bi temamî bi esasê pawîtişê pakîya nê bajarî û viraştişê bajarêko pak no kar girewt xo ser. Ez wazena mizgînîya ci bidî ke heta ke ma bajarêko pak virazê, heta ke ma Amedêko pak virazê, heta ke ma bajarêko ke şarê ma heq keno virazê, ma do bi heme cehdê xo nê xizmetê xo dewam bikê."

'Ma do rayîranê serekeyan ser o 4 hezar sitilê çopî ronê'

Bakanî va ke ê do 4 hezar sitilê çopî ronê rayîranê serekeyan ê bajarî ser û qeyd kerd ke eke hewce bibo ê do na hûmare hetanî 10 hezarî zêde bikê. Bakanî va ke tenya pawîtişê înan o yo ke şar nê qutîyanê çopan bixebitno û wina dewam kerd: "Nika ma kewtî xebatêka cidî ke ma qutîyanê çopan vila bikê heme bajarî. Nika ma do teqrîben 4 hezar sitilê çopî ronê heme rayîranê serekeyan ê bajarî ser o. Pawîtişê ma, waştişê ma şarê ma ra o yo ke nê qutîyanê çopan bixebitnê. çopan nêerzê cayêk, bierzê qutîyanê çopan. Verê cû seba sebebanê cîya-cîyayan qet yew sitilê çopî nêmendbî nê bajarî de. Coka ma do şarê xo nê qutîyanê çopan reyde bîyarê têhet, çopanê înan zî qutîyanê çopan reyde bîyarê têhet. Eke ma naye de ser bikewê, bawer bikê ma do pîya bajarêko pak, bajarêko mirdîya xo pak virazê ke şar eşkeno tede biciwîyo. Ma bi hawayêko cidî ma wazenê ke şarê ma nê qutîyanê çopan bixebitno. Coka ma do xebata xo dewam bikê, ma do goreyê waştişê şarî heme şaredarîyanê xo reyde xebatêk bikê. Tenya Şaredarîya Şaristanê Girdî nê heme şaredarîyê ma na manaya de destê xo kerdo binê kerra. Şaredarîyê bînî, şaredarîyê qezayanê merkezî zî na babeta qutîyanê çopan de yew xebata cidî kneê. Ê do rayîranê xo yê mîyanênan de na xebate biramê, ma do rayîranê serekeyan ê bajarî de bikê. Ma do bi temamî xebatêka muştereke, kulturêko muşterek virazê û coka ma fikirîyenê ke ma do cayêko ke Amedî rê beno, hazir bikê. Na mana de ma wazenê ke şarê ma zî destegê xo bido ma. Ma do cehd bikê ke ma şarê xo heq bikê."

'Wa şarê ma wayîrîya xizmetî biko’

Bakanî venga şarî da û va: "Ma do xizmetî berê linganê şarê xo ver, wa şarê ma zî wayîrîya nê xizmetî biko. Ma do pîya xebatanê rindan bikê, ma do pîya Amedêko rindo virazê."