Şaredarîya Amedî ya Şaristanê Girdî, studyoya qeydê vengî ya ke texmînen heşt serrî yo pasîf bîye tamîr kerde û Projeyê Kitabxaneyê Venginî ke astengdarê vînayîşî do tira îstîfade bikerê, reyna ramit.

Serekîya Daîreya Xizmetê Astengdar û Pîran, seba ke astengdarê vînayîşî bieşkê biresê materyalê nuştekî, Projeyê Kitabxaneyê Venginî heşt serrî ra dima reyna da destpêkerdene. Kitabxaneyo Vengin do bikero ke astengdarê vînayîşî biresê materyalanê nuştekîyan.

Cayê Cuya Hempare yê SumerParkî de studyoya vengî ke bi mottoya "Cuya Hempare ya Resayoxe" ameya viraştene, tede xebatî do rayîrê zerrîwazan ra bêrê ramitene. Proje de, seba astengdaranê vînayîşan do kitabê dersan, hîkaye, şîîr û romanî sey materyalê wendişî bêrê vengdayene. Eserê ke ameyê vengdayene do bêrê arşîvkerdene.

Vengê ke ameyê arşîvkerdene do keyepelê Şaredarîya Şaristanê Girdî (www.diyarbakir.bel.tr) û Kitabxaneyê Şarî yê Amîda de bêrê pêşkêşkerdene.

'Ma zerrîwazanê wendoxan pawenê merkezê ma'

Serekê Daîreya Xizmetê Astengdar û Pîran Îsmaîl Degîrmencîyî beyanatî de bal ant cîyayîya bajarî ser û dîyar kerd ê bi amancê pîya û hempar ciwîyayîşî xebatanê xo dewam kenê. Degîrmencîyî wina qisey kerd: "Wexto ke ma Kitabxaneyo Vengin da destpêkerdene ma resayoxîye û dewamkerdişî da vernîya xo. Ma bi mottoyê 'Cuya Hempare ya Resayoxe’ 8 serrî ra dima Kitabxaneyo Vengin reyna awan kerdbî. Bi no mana ma heme zerrîwazanê xo ke seba wendişê xo ke sewîyeya akademîk ra klasîkanê dinya şinê biwanê, pawenê merkezê xo."