Şaredarîya Amedî ya Şaristanê Girdî, çarçewaya aktîvîteyanê 8ê Adare Roja Cinîyanê Kedkaran a Dinya de nawitişê fîlmê "Nameyê Mi Bextîyar o" ke behsê Mutlu Kaya ke marûzê şîdetê camêrdan menda keno, eleqeyêko zaf dî.

Serekîya Daîreya Xizmetê Cinî û Keyeyî, seba 8ê Adare Roja Cinîyanê Kedkaran a Dinya aktîvîteyan organîze kena û dewam kena ke cinîyan reyde bêro têhet. Çarçewaya aktîvîteyan de Merkezê Kultur û Kongre yê Çand Amedî de nawitişê fîlmê "Nameyê Mi Bextîyar o" ke behsê têkoşînê ciwîyayîş û edaletî yê deyîrbaze Mutlu Kaya keno ke netîceyê şîdetê camêrdî de zaf derd û kulî antî, ame kerdene. Cinîyî, Mutlu Kaya û keyeyê aye zî beşdar bîyî temaşe kerd, demêko hîsdar ciwîyayî.

'Ma do seba cinîyan fek bi têkoşînê xo ra nêverdê'

Badê nawitişê fîlmî Sereka Daîreya Xizmetê Cinî û Keyeyî Ozden Gurbuz Sumer bi nameyê Mutlu Kaya, Songul Kaya rê vilî dîyarî kerdî. Songul Kaya ke va keyeyê aye sey endaman her keso ke nê fîlmî temaşe kenê, eynî dejan ciwîyenê la hîna zî benê bihêz, wina dewam kerd: "No têkoşînê piştîdayîşê cinîyan de ma soz dayo ke ma seba cinîyan bibê rayîr, bibê hêvî, bibê embaz, bibê pawitox. Tîya ra ez seba hazaran cinîyan ke mi rê rayîr bîyê, Mutlu rê ke sey embazêk seba mi û seba heme cinîyan hêz da, wazena ke şima çepikan bikuwê seba înan. Ma sey cinîyan qerar dayo ke ma do ciwîyayîşê xo de seba heme canan, seba heme cinîyan bibê rayîr. Ma do seba heme cinîyan fek têkoşînê xo ra nêverdê."

'Bî hêvîya cinîyan ê ke têkoşîn danê'

Sereka Daîreya Xizmetê Cinî û Keyeyî Ozden Gurbuz Sumer ke heme cinî bi nameyê Şaredarîya Amedî ya Şaristanê Girdî silam kerd, wina qisey kerd: "Cayêkê fîlmî de Mutlu vatêne: 'ez wazena biba qehremana keyeyê xo'. Mutlu, ewro bîya hêvî û qehremana bi milyonan cinîyan ke têkoşînê cinîyan danê, ke piştîdayîşê cinîyan vera-vera awan kenê. Ma ke ver bi 8ê Adare roja piştîdayîş û têkoşîyayîşî şinê, nê tewir aktîvîteyan de têhetameyîşî hem seba ke dejanê ma weş bikê hem zî seba ke ma bikê bihêz, ma zaf qîymet danê ci. Mutlu seba ney wesîle bî, fîlm seba ney wesîle bî."