Kaykerdoxê Tîyatroyê Bajarî yê Şaredarîya Amedî ya Şaristanê Girdî (DBŞT), aşma adare de kayê "Çalakîya Malçêkirî", "Strip-Tease", "Keçelok" û "Don Kîxot" reyde do sahne ser o bibê.

Kaykerdoxê Tîyatroyê Bajarî yê Şaredarîya Amedî ya Şaristanê Girdî (DBŞT) ke binê Serekîya Daîreya Karanê Kultur û Sosyalan de fealîyetanê xo kenê, turneyê xo dewam kenê û aşma adare de zî Merkezê Kultur û Kongre yê Çand Amedî de do dewam bikê temaşekerdoxan reyde bêrê têhet. 7-14-15ê Adare de saete 20:00 de kayê "Çalakîya Malçêkirî" do bêro kaykerdene.

Kayêko ke hetê kaykerdoxanê cinîyan ê DBŞTî’ ra kitabê Şenay Tanrivermiş "Ev Yapımı Eylem"î ra ameyo adaptekerdene, hetê Elvan Koçer ra ame dayene kaykerdiş, tede Nurşen Adiguzel, Rêzan Kaya, Perînaz Delazy û Zeycan Ateş ca gênê. Kay, hîkayeya hîrê cinîyan ser o yo ke keye de kom bene.

22ê Adare saete 20:00 de kayê "Strip-Tease" o bi kirmanckî sahne ser o yo, bi rejîya Sena Ozbeyî yeno kaykerdene, tede Zeycan Ateş, Lokman Baran, Sena Ozbey ca gênê.

Kayê domanan "Keçelok" domanan paweno

Kayê domanan "Keçelok" ke behsê serkewtiş nazikîye, pakîye û zerrîweşîye keno, 23ê adare de saete 13:00î de do temaşekerdoxanê domanan reyde bêro têhet. Kayo ke Celîl Toksozî hîkaye û kayê ey nuşto, açarnayîşê kurdkî Kawa Nêmîrî kerdo û tede Rêzan Kaya, Elvan Koçer û Şîlan Alagoz ca gênê.

Kayê verênî yê sezonî "Don Kîxot" ke romanê Cervantesî ra hetê Ferhat Keskînî ra ameyo adaptekerdene bi eynî nameyî bi kurdkî, do dewam biko ke sahne ser o bêro kaykerdene. Kayê Don Kîxotî de ke Ferhat Keskînî dano kaykerdiş; Ozcan Ateş, Şahabettîn Dag, Rezan Kaya, Elvan Koçer, Sena Ozbey, Kevnar Înal û Şîlan Alagoz karakteranê serekeyan de ca gênê. Kaykerdoxê DBŞT’î ke wexto ke adapteyê klasîkan kenê formî ra tewir û metodê cîya-cîyayan test kenê, adapteyê kurdkî yê Don Kîxotî de tena açarnayîşê metnî nê heme hetan ra adaptekerdişê kurdkî kenê. Kayî de ke têkilîya roman bi mît, mîtolojî û dengbêjîya kurdan reyde yeno vatene, 28ê adare de saete 20:00î de Merkezê Kultur û Kongre yê Çand Amedî de paweyê temaşekerdoxan o.