Endama meclîsê Şaredarîya Amedî ya Şaristanê Girdî Kader Uzun Madenkuyu, ke beşdara roniştişê Kongreya Herêmkî ya Parlamentoyê Ewropa bîye, waşt ke vera tetbîqatê qeyûman kongreyanê Yewîya Ewropa û organê YE'yî de gamê konkretî bêrê eştene.

Roniştişê yewinî yê Kongreya Herêmkî ya Parlamentoyê Ewropa yê serra 2025î qedîyayî. Roja peyêne ya roniştişan de, Madenkuyu behsê polîtîkaya cinîyan, tetbîqatê qeyûman û demokrasîya herêmkî kerd. Madenkuyu bale ant vengdayîşê seba çarekerdişo demokratîk û daîmî yê problemê kurdî ser o û va ke ganî no vengdayîş bibo prosesêkê çarekerdişî.

Madenkuyu dîyar kerd ke cinîyî her merhelaya polîtîkayan de astengî vînenê. Aye va sey mekanîzmaya hemşaredarîye û temsîlkerdişê seypêyî, nê astengî şenê bêrê wedarnayene. Aye dîyar kerd ke bi no qayde demokrasîya kulturê cîyayan, bawerî û nasnameyanê cinsîyetan bêro temînkerdene.

Madenkuyu derheqê tetbîqatê qeyûman de dîyar kerd ke 2016î ra heta ewro, rayberê şarê kurdan ê weçînayeyî ameyî girewtene û cayê înan de qeyûmî ameyî tayînkerdene. Aye va hetanî nika 95 rayberê şaredarîyan ke 2014 de weçînîyayî û 48 rayberê şaredaryî ke 2019 de weçînîyayî, cayê înan de qeyûmî ameye ronayene. Reyna 2024 de zî 10 şaredarîyanê înan û 4 şaredarîyê CHP’yî rê qeyûm ameyî eştene.

Madenkuyu waşt ke kongreyanê YE û organê ey berpirsîyarîye bigîrê û seba nê tetbîqatê qeyûman gamê konkretî bêrê eştene.