Şûbeyê Pawitişê Ziwanî yê Şaredarîya Amedî ya Şaristanê Girdî, dezgehê çapemenîyanê ke bi Kurdkî weşan kenê, înan reyde seba standardîzekerdi ameyî têhet.

22ê Nîsane de Roja Rojnamegeranê Kurdan de badê taştîya mensûbanê çapemenî reyde Merkezê Kongre yê Çand Amedî de kombîyayîşêk virazîya. Mudirê Şûbeyê Pawitişê Ziwanî Tahir Baykusak û Zana Farqînî kombîyayîş îdare kerd. Kombîyayîş de problemê xeberdarîya kurdkî û çekuyan de ke yenê şuxulnayene, viraştişê ziwanêko yewpar ser o fikrî vajîyayî.

Zana Farqînî va ke ê cehd kenê terminolojîyêko yewpar virazê. Farqînî va ke înan nê kombîyayîşî bi zanayîş Roja Rojnamegeranê Kurdan de organîze kerdî û do aşmêk de reyêk dewam bikê ke problêmanê ziwanî safî bikerê.