Tûrnuvayê Tenîsî yê Amed Cupî yê 16. dewam keno. Serekîya Daîreya Xizmetanê Ciwanîye û Sporî tûrnuva her serre biserûber organîze kena. Amanc o yo ke ciwan û pîlî bêrê tenîsî, şaristanî de kulturê tenîsî vila bibo û heskerdoxê tenîsî bêrê têhet. Tûrnuva sporkaran ra eleqeyêko gird vîneno.

Tûrnuva çar kategorîyan de yeno kerdiş: Ciwan Camêrd, Ciwan Cinî, Pîl Cinî û Pîl Camêrd. Beşdarîya kategorîyanê cinîyan bale ancena; kategorîya Ciwan Cinî de 20, kategorîya Pîl Cinî de zî 108 sporkarî musabeqe kenê. Musabeqeyî çar tesîsanê cîyayan de binê çimdarîya hakeman de yenê kaykerdiş.

Sporkar û zerrîwaz Hakki Firatî vat ke Amed Cup kulturê sporî yê Amedî de cayêkê ci o muhîm est o û muhîmîdayîşê îdareyanê herêmkîyan seba vilabîyayîşê tenîsî tesîrdar bî: "2011 de wexto ke Parkorman de kortêkê tenîsî ame viraştiş, eleqe û waştişê şarî ser o no tûrnuva dest pêkerd. Zaf metropolan de tenîs cor ra ver bi warî vila beno, la Amed de binge ra ver bi corî vila bî." Firatî ard ziwan ke şaristanî de 2 hezarî ra zêdeyêr sporkarê tenîsî yê lîsansinî û panc klubê tenîsî yê aktîfî est ê û vat: "Ez hêvî kena ke serranê ameyoxan de Amed Cup bibo tûrnuvayêko mîyannetewî."

Antrenor û sporkar Abdullah Uysalî zî vat ke eleqeyo ke Amed de tenîsî rê est o, her serre zêde beno: "Ma seba organîzekerdişê tûrnuva û piştîdayîşê şaredarîyan sipas kenê. Helbet kêmanîyê ma zî est ê. Ma wazenê ke Şaredarîya ma ya Şaristanê Girdî û Şaredarîya ma ya Peyasî kortan hîna aver berê."

Hafize Alpergin Firat vat ke nêzdîyê 12 reyan beşdarê tûrnuva bîya, verê cû bîya yewine û dîyine û ewro resaya nêmfînal: "Bi taybetî zêdebîyayîşê hûmara sporkaranê cinîyan mi zaf şa keno. Ez wazena ke tûrnuvayê winasî zêde bibê."

Çarnayox: Mehmet Olmez