Amed Cup her serre hetê Serekîya Daîreya Xizmetanê Ciwanîye û Sporî ra biserûber yeno organîzekerdene. Tûrnuvayo 16. şaristanî de çar tesîsan de kay bî û bi musabeqayanê fînalî qedîya ke Kompleksê Sporî yê 500 Evlerî yê Peyasî de ameyî kaykerdene.

Tûrnuva bi amancê nêzdîkerdişê ciwan û pîlan ê sporê tenîsî, vilakerdişê kulturê tenîsî yê şaristanî û pêardişê heskerdoxanê tenîsî ame organîzekerdene. 354 sporkarê emranê cîyayan beşdarê ci bîyî.

Musabeqayî çar kategorîyan de bîyî

Tûrnuva çar kategorîyan de ame kaykerdene: Camêrdê Ciwanî, Cinîyê Ciwanî, Cinîyê Pîlî û Camêrdê Pîlî. Kortê Tenîsî yê Girewteyî yê 75 Mahabad, Kompleksê Sporî yê 500 Evler, Kortê Tenîsî yê Parka Ersin Tatarî ya Şaredarîya Rezanî û Kortê Tenîsî yê Parkormanî mêmandarîya musabeqayan kerd ke binê çimdarîya hakeman de ameyî kaykerdene.

Yewin û dîyinê çar kategorîyan dîyar bîyî

Kategorîya Cinîyanê Pîlan de Heja Ekmekçi bîye yewine, Hafize Alpergin Firat bîye dîyine. Kategorîya Cinîyanê Ciwanan de Dîcle Ertaş bîye yewine, Asmîn Gorsav bîye dîyine. Kategorîya Camêrdanê Pîlan de Zulkuf Polat bî yewin, Orhan Eldemir bî dîyin; kategorîya Camêrdanê Ciwanan de zî Firat Kişmir bî yewin, Mustafa Akan bî dîyin.

Hemşaredar û endamanê meclîsî kupayî dayî

Fînalan ra pey Hemşaredarê Şaredarîya Amedî ya Şaristanê Girdî Serra Bucak û Emîn Ay û endamê meclîsê şaredarîye Ozlem Başari û Ramazan Koçî kupayî dayî sporkaranê ke derece girewtî û fînalîstan. Dima Hemşaredaran sporkaran reyde tenîs kay kerd û hakem, sporkar û xebatkarî pîroz kerdî.

Çarnayox: Mehmet Olmez