Serekîya Daîreya Viraştiş, Miqate û Tamîrê Rayîran, bi amancê xurtkerdişê binawanîya resî, dergkerdişê emrê bikarardişê rayîran û zêdekerdişê emnîyetê ramitişî, xebatanê xo dewam kena. Na çarçewa de ekîban Cadeyê Fatih û Cadeyê Gurselî de ke rîyê xebatanê binawanî û varanan ra hermîyaybî, xebata asfaltkerdişî kerde. Cadeyê ke bi demêko derg nêameybî newekerdiş û bi rewşa xo ya nikayîne seba ramitoxan û esnafanê herême bîyî sebebê probleman, netîceya xebatan de bi asfalto germ ameyî başkerdiş.

Esnafan sipas kerd

Esnafan dîyar kerd ke bi newekerdişê rayîran res bîyo hîna biemnîyet û rehet; problemê toz û duyî yê ke rîyê rayîrê hermîyayeyî ra virazîyayêne zî bi hedêko zêde ortî ra wedarîyayî. Esnafan keyfweşîya xo arde ziwan û Şaredarîya Amedî ya Şaristanê Girdî rê sipas kerd.

Atîlla Yavuzî ke vat 40 serrî yo Cadeyê Fatihî de esnafîye keno, îfade kerd ke rayîr bi demêko derg nêameybî newekerdiş û va: "Homa Şaredarîya ma ya Şaristanê Girdî ra razî bo. Ez seba xebatanê ci pîroz kena."

Mustafa Utangacî vat: "Verê ma toz û dûyî ra perîşan bîyêne. Rîyê rayîranê hermîyayeyan ra muşterî nêameyêne. La nika asfalt ame kerdiş, ma memnûn ê. Ma toz û dû ra xelisîyayî. Erebeyî zî bi rehetî vîyarenê."

Fesîh Murayî vat ke cade 7-8 serrî yo nêameybî newekerdiş û bi taybetî badê xebatanê gazê xozayî rayîr bîbî bêkêr. Murayî waşt ke peyarayîrî zî bêrê newekerdiş û vat: "Rîyê xebatanê gazê xozayî ra rayîrî bîbî xirab, esnaf zaf mexdûr bîbî. Çend rojî verê ameyî, rayîr asfalt kerd. Eke peyarayîran zî bikerê, do zaf weş bibo."

Şaban Eraltunkara zî keyfweşîya xo ard ziwan û dîyar kerd ke xebata asfaltkerdişî demêko kilm de temam bîye: "Emrê mi 50 serrî yo, 50 serrî yo ez nê welatî de ya; reya verêne mi xebatêka asfaltî ya wina rinde dîye. Ez bi rastî pîroz kena. Verê tay mendbî bî ke peyarayîrî bigîrîyê, toz û herre zaf bî. Demêko kilm de ma nê karî ra xelisnayî."

Salîh Atalay vat ke rîyê tozê rayîrî ra berê cayanê karî nêeşkayêne akerê û kelmelê dikanan tim qirêj bîyêne: "3 serrî yo ez tîya de esnafîye kena. Ma rîyê toz û dûyî nê rayîrî ra zaf zehmet ant, ma resaybî rewşêk ke ma nêeşkayêne nefes bigîrê. Homa Şaredarîya Şaristanê Girdî ra razî bo, ameyî rayîr kerd. Ma nê xebate ra memnûn ê."

Yusuf Ozboyacîyo ke 16 serrî yo Cadeyê Fatih ê Baglarî de esnafîye keno, dîyar kerd ke na xebate heta ewro xebatanê tewr weşan ê cadeyî ra yew a: "Verê ke bêro kerdiş, ma zaf cefayê ci ant, dikanê ma zaf qilêr bîyî. Na xebate zaf weş bîya."