Şaredarîya Amedî ya Şaristanê Girdî dewreyê 2024-2026î de merkezê şaristanî û 14 qezayanê dewan de 637 hezar û 951 ton asfalt rokerd. Na dewre de cade û bulwarî newe bîyî, rayîrê îmarî yê neweyî abîyî û şaredarîyanê qezayan û dezgehan rê 50 hezar û 310 ton malzemeyî piştî ame dayîş.

Serekîya Daîreya Viraştiş, Miqate û Tamîrê Rayîran a Şaredarîya Şaristanê Girdî Salona Meclîsî de pêşkêşîyêk daye ke şaredarîyê qezayan derheqê xebatanê rayîran de bêrê agahdarkerdiş û xebatê ameyoxî bi koordînasyon bêrê ramitiş. Hemşaredarê Şaredarîya Şaristanê Girdî Serra Bucak û Emîn Ay, Hemverfekê Meclîsê DBB'yî Demet Ceylan û Ayhan Karatekîn, hemşaredarê qezayan, Sekreterê Pêroyî Serdar Bakiroglu û berpirsîyaranê yewînanê eleqedaran pêşkêşîye de ca girewt.

Merkezê şaristanî de 350 hezar ton ra zêdeyêr asfalt robî

Qezayanê merkezî de 350 hezar û 355 ton asfalt robî. Rayîr û bulwaranê serekeyan de ke binê selahîyetê Şaredarîya Şaristanê Girdî de yê, rayîrêko 34 hezar û 130 metreyî de 206 hezar û 587 ton asfalt robî; cade û kuçeyanê şaredarîyanê qezayanê merkezî de zî rayîrêko 53 hezar û 215 metreyî de 143 hezar û 768 ton asfalt ame rokerdiş.

Bulwaran de peyarayîr û roştî

Bulwarê Selahattin Eyyubî de 13 hezar û 947 metrekareyî peyarayîrê bazaltî ame viraştiş, 48 izxarayê awa varanî û 81 direkê roştî ameyî ronayîş û 250 darê çinarî resayî herre. Bulwarê Firatî de 20 hezar metrekareyî peyarayîrê bazaltî ame viraştiş, 100 izxara û 120 direkê roştî ameyî ronayîş; hetê stadyûmî de zî 14 hezar metrekareyî peyarayîrê parkeyî, 55 izxara û 60 direkê roştî ameyî viraştiş.

Rayîrê îmarî yê neweyî

Dorûverê Nêweşxaneyê Şaristanî de cadeyanê Nazim Hîkmet, Jîyan, Abdulkadîr Topkaç, Leyla Qasim û Çarçira de rayîrêko 7 kîlometreyî de xebatê kendiş, pirkerdiş û rayîrî qedêyayî. Bajaro Newe de Bulwarê Mîr Celadetî de rayîrêko îmarî yê 2 kîlometreyî abî û 21 hezar metrekubî dêsê kerrayan ame viraştiş; Bulwarê Mîr Celadetî û Cadeyê Meyti Dono de warêko 90 donimî de qîrkerdiş ame kerdiş. Sûr de herêma Teknokentî de rayîrêko newe yê 2,2 kîlometreyî abî û 40 hezar metrekareyî de asfalto germ robî; Cadeyê Birkleyn de zî 1,4 kîlometre asfalto germ robî.

Qezayanê dewan de 287 hezar ton ra zêdeyêr asfalt

Qezayanê dewan û rayîranê taxanê girêdayeyan de 2024 de 70 hezar û 58 ton, 2025 de 90 hezar û 237 ton, 2026 de zî 127 hezar û 302 ton asfalt robî; wina 14 qezayanê dewan de 287 hezar û 597 ton asfalt ame rokerdiş.

Şaredarîyanê qezayan û dezgehan rê piştîyê malzemeyî

Şaredarîya Şaristanê Girdî goreyê talebanê ke ameyî, plentê asfaltî ra 50 hezar û 311 ton malzeme şawit şaredarîyanê qezayan û dezgehanê eleqedaran. Serekîya Daîreya Viraştiş, Miqate û Tamîrê Rayîran do xebatanê xo dewam bikera ke torrêka resî ya hîna rehet û biemnîyet pêşkêşê hemwelatîyan bibo.