Kayapinar û Baglar de 2 cadeyî pê 10 hezar û 400 ton asfaltî newe bîyî
Şaredarîya Amedî ya Şaristanê Girdî, Cadeyê Abdulkadîr Aksu yê qezaya Kayapinarî û Cadeyê Gîrne yê qezaya Baglarî de xebatê asfaltî qedênayî. Her di cadeyan de ke bi pêroyî 2 hezar û 680 metre derg ê, 10 hezar û 400 ton asfalt robî û rayîrî reyna trafîkî rê abîyî.
Şaredarîya Amedî ya Şaristanê Girdî, seba ke seranserê şaristanî de konforê resî û emnîyetê trafîkî zêde bibo, xebatanê newekerdişê rayîran dewam kena. Ekîbê Serekîya Daîreya Viraştiş, Miqate û Tamîrê Rayîran asfalt rokenê, cade û bulwaran de xebatê binawanî qedêyayî.
Cadeyê Abdulkadîr Aksu rê 9 hezar û 200 ton asfalt
Cadeyê Abdulkadîr Aksu yê qezaya Kayapinarî de, rayîrê 1.900 metre derg û 30 metre hîrayî ser o bi pêroyî 9 hezar û 200 ton qat serên robî. Cade kontrolanê ekîban ra dima reyna trafîkê erebeyan rê abî.
Cadeyê Gîrne xebatanê gazê tebîî ra dima newe bî
Cadeyê Gîrne yê qezaya Baglarî de zî xebatanê binawanî yê gazê tebîî ra dima asfalt newe bî. Ekîban cadeyê 780 metre derg û 10 metre hîrayî ser o bi pêroyî 1.200 ton asfalto germ rokerd û cade reyna trafîkî rê abî.
Xebatê asfaltî do 3 cadeyan de dewam bikerê
Şaredarîya Şaristanê Girdî, rayîran ser o ke xebatê binawanî yê gazê tebîî qedîyayî, do newekerdişê rayîran dewam bikera. Çarçewaya nê xebatan de do cadeyanê Nukhet Coşkun, Kardeşlik û Gocmenler yê qezaya Baglarî de zî asfalt robîyo.
Açarnayox: Mehmet Olmez
