Mudirîya Pêroyî ya Îdareyê Awe û Kanalîzasyonî ya Amedî (DÎSKÎ), bi amancê peydakerdişê hewceyîya binawanîya awa lêmine ya waranê ciwîyayîşî yê neweyan ke qezaya Hêni de bi lez aver şinê, Taxa Merkezî de dest bi xebata ronayîşê xeta kanalîzasyonî ya newîye kerd.

Xebata ke rîyê awanîya qezaye ra ke vejîya kapasîteya şebekeya nikayîne ser o, ame plankerdene, amanc kena ke binawanîya herême bi lezîya awanîye xurt bikero.

Çarçewaya xebate de ke hetê ekîbê Mudirîya Şûbeyê Hêni ra yena ramitene, Taxa Merkezî de xeta kanalîzasyonî ya teqrîben hezar metre derg do bêro ronayene. Xeta newîye, do awa lêmine ya teqrîben 250 daîreyan ke 35-40 blokanê warê ciwîyayîşî yê neweyî de yê, bi hewayêko biemnîyet şebekeya serekîye ra girê bida.

Yeno plankerdene ke xebate aşmêk de bêro temamkerdene

Bi temambîyayîşê xebate ya teqrîben aşmêk de, warê ciwîyayîşî yê neweyî yê Taxa Merkezî do bi temamî entegreyê şebekeya kanalîzasyonî ya qeza bibê.

Sermîyangozerîyê binawanî goreyê hewceyîyan dewam kenê

Mudirê Şûbeyê Hêni yê DÎSKÎ Bekir Narinî derheqê xebatan de agahî daye û îfade kerd ke warê ciwîyayîşî yê neweyî yê Taxa Merkezî mojnenê qeza gird bena û ê amanc kenê ke nê girdbîyayîşî reyde pê sermîyangozerîyanê binawanî bibê cewabêk. Narinî ard ziwan ke bi temambîyayîşê xeta kanalîzasyonî ya teqrîben hezar metreyî 250 daîreyê ke 35-40 blokan de yê, do biresê sîstemê awa lêmine yo biweşî, va ke ekîbî bi hewayêko plankerde xebitîyenê û yeno amanckerdene ke proje teqrîben aşmêk de bêro temamkerdene. Narinî qeyd kerd ke seba ke herkesê ke Hêni de ciwîyenê, bieşkê biresê xizmetanê binawanî yê modernan, sermîyangozerîyan goreyê hewceyîyanê qeza dewam kenê.