Çarçewaya projeyî de ke yeno amanckerdene hîrê aşman de bêro temamkerdene, do Royê Pasûrî ser o awanîya awegirewtişî ya bi kapasîteya 50 lître ya sanîyeyî, merkezê terfî, di depoyê modularî yê bi kapasîteya 80 metrekubî û sîstemê elektromekanîkî bêrê awankerdene.

Royê Pasûrî ra do sanîye de 50 lître awe bêro girewtene

DÎSKÎ, seba hewceyîya awa şimitişî ya merkezê qezaya Pasûrî projeyê "Karê Viraştişê Merkezê Terfî û Awanîya Awegirewtişî yê Royê Pasûrî" ana meydan ke sondajê mewcûdî tede seba temînkerdişê talebê aw ê ke zêde beno kêmî mendê. Royî de bi kendiş, dekerdiş û tehkîmatê kerrayan warêk do bêro viraştene ke awe tede bêra serûberkerdene. Bi pompaya binawe ke do platformê awe ser o bêra ronayene, royî ra do sanîye de 50 lître awe bêro girewtene. Awa ke yena girewtene, do depoyê modularî yê polayê nêzenginî yê 50 metrekubî de bêro depokerdene ke herêma bîrê kesonî de yeno awankerdene, û uca ra do xeta neqilkerdişî ya mewcûde ser ra bireso sîstemê awguznayîşî yê mewkîya Darabînî.

Kapasîteya depokerdiş û terfî do bêra xurtkerdene

Mewkîya Darabînî de depoyo 30 metrekubî, herêma bîrê kesonî de zî depoyo 50 metrekubî yê modularî do bêrê awankerdene. Merkezê terfî yê herêma bîrê kesonî de di pompayê 160 kîlowatî, sîstemê mewkîya Darabînî de zî di pompayê 137 kîlowatî do bêrê xebitnayene. Sîstemo elektromekanîk ke do bi xeta neqilkerdişê enerjî, trafo, otomasyon û elemananê kontrolî bêro piştîdayene, do temîn bikero ke awe bi hewayo biemnîyet bêra girewtene û bireso tesîsê awguznayîşî.

Bi sîstemê neqilbarî tesîrê dorûverî do bêro sînordarkerdene

Duba, platform û elemanê hetkarî yê awanîya awegirewtişî do sîstemanê poladinan ê neqilbaran ra bêrê viraştene. Bi no hewa hûmara awanîyanê betonarmeyan ê daîmîyan a cayê royî do bêra kêmîkerdene û demanê laserî de elemanê sîstemî do bieşkê bêrê akerdene û bêrê berdene warêko biemnîyet. Sîstemo modular do karê miqate û tamîrî bikero asan û eke hewce bo, do îmkan bido ke cayê awegirewtişî bêro vurnayene. Serê yewîneyanê awguznayîşî yê Darabînî û merkezê terfî yê herêma bîrê kesonî do bi konstruksîyonê poladinî û panelanê îzolekerdeyan bêrê padayene.

Cîyayîya çimeyan do emnîyetê awa qeza xurt bikero

Serekê Daîreya Herêma 1. ya Xebitnayîşan a DÎSKÎ Abbas Aslanî dîyar kerd ke proje do planê awe yê demdergî yê merkezê qezaya Pasûrî xurt bikero û va: "Vurîyayîşê îklîmî rasterast tesîr keno serûberê varanî û kapasîteya weyekerdişê çimeyanê awa binerdî. Bi dekerdişê Royê Pasûrî yê sîstemê awa şimitişî ma amanc kenê ke zordayîşê serê sondajan kêmî bikerê û awa qeza biresnê struktûrêko hîna hemseng. Ma nê sermîyangozarî sey gamêka demderge erjnenê ke cewabê hewceyîya ewroyêne ya Pasûrî dana û seba talûkeyanê awe yê ameyoxî amadekarî kena."