Şaredarîya Amedî ya Şaristanê Girdî bi heme yewînanê xo mudaxeleyê awa pêserbîyayîye û aweeştişan kerd ke varanê zafî seranserê şaristanî de ardî meydan. Ekîbî goreyê 322 vengdayîşan ke resayî Merkezê Vengdayîşî ALO 153, şawîyayî warî; awa cade û bulwaran vete û izxara û xetanê awa varanî pak kerdî.

Bi koordînasyonê Sekreterê Pêroyî Serdar Bakiroglu DÎSKÎ, serekîyê daîreyanê Pawitişê Dorûverî, Weşîye, Park û Baxçeyan û Îtfaîya û şaredarîyê qezayan cayanê awgirewtişî de lez mudaxele kerd. Zabita zî hemwelatîyan rê ardim kerd ke resî de zehmetî dîyêne.

Merkezê şaristanî de 205 cayan rê mudaxele bî

DÎSKÎ merkezê şaristanî de 30 ekîb û 120 personel wezîfedar kerdî; xebatan de 14 vîdanjorî, 15 pîkapî, 4 kepçeyî û 15 motopompî ameyî xebitnayîş. Ekîbanê Mudirîya Şûbeyê Karnasîya Kanalî mudaxeleyê 205 cayan kerd ke awe tede pêser bîye û herikîyayîşê xetanê awa varanî hêdî bîyo. Çatrayîrê pirdinî, rayîrê serekeyî û bulwarî verê de ameyî girewtiş.

ALO 153 rê 322 vengdayîşî ameyî

Goreyê probleman ke hemwelatîyan xeber dayî, ekîbî şawîyayî cayan; awa varanî ame vetiş, izxarayê xetimîyayî ameyî pakkerdiş û rayîrê ke resî tede vindertbî, reyna abîyî.

Îtfaîya mudaxeleyê 90 hadîseyan kerd

Ekîbanê Serekîya Daîreya Îtfaîya mudaxeleyê 90 hadîseyan kerd; awa 3 keyeyan û 22 cayanê karan vete. Hemwelatîyê ke warê akerdeyan û erebeyan de mendbî, ameyî vetiş û resnayî cayanê biemnîyetan. Ekîbanê zabita zî hemwelatîyê ke dingan de derg otobus pawitêne, biemnîyet resnayî cayanê înan.

Mudirê Şûbeyê Karnasîya Kanalî yê DÎSKÎ Vehbî Demîrkiranî vat: “Varano ke wextêko kilm de zaf bîyo, tayê cayan de kapasîteyê sîstemê vetişî derbaz keno. Ma nê tesbîtan bi etudanê teknîkan erjnenê û cayan de ke hewce kenê, miqate, rindêrkerdiş û zêdekerdişê kapasîteyî kenê.”