Mudirîya Pêroyî ya Îdareyê Awe û Kanalîzasyonî yê Amedî (DÎSKÎ), seba temînkerdişê hewceyîya awe ya taxe girêdayîşê çimeyê neweyî kena, çunke di çimeyê awe ke Taxa Kaledîbî weye kenê, badê erdlerzanê 6ê sibate 2023î ziwa bî.

Badê muracatê Muxtarê Taxa Kaledîbî Bîlal Yeleşî, ekîbanê Mudirîya Şûbeyê Hêni ya DÎSKÎ herême de xebata kifş û etudî kerde. Bi xebata ke çimeyo newe de ameye ramitiş ke netîceyê etudan de ame tesbîtkerdiş, sanîye de teqrîben 1,5 lître awe ameye girewtiş.

Çimeyo newe bi xeta 500 metreyî şebeke ra yeno girêdayîş

Ekîbî bi amancê arêdayîş û pawitişê awa çimeyî awanîya awearêdayîşî virazenê. Awa ke tîya ra yena girewtiş, do bi xeta terfî ya teqrîben 500 metreyî bireso şebekeyî. Bi girêdayîşo newe yeno amanckerdiş ke temînkerdişê awe ke rîyê ziwabîyayîşê çimeyan ra kêmî bîyo, piştî bêro dayîş û kêmanîya awe ya ke bi taybetî aşmanê hamnanî de bena, bêra wedarnayîş.

'Ma amanc kenê ke girêdayîşî 4 rojan de temam bikerê'

Mudirê Şûbeyê Hêni yê DÎSKÎ Bekîr Narînî derheqê xebate de agahî da û dîyar kerd ke etudanê warî de ke badê muracatê muxtarîye ameyî kerdiş, înan tesbît kerd ke çimeyanê awe yê taxe ra yew badê erdlerzî ziwa bîyo.

Narînî derheqê xebatand e vat: "Badê muracatê muxtarê ma, ma embazanê xo yê ekîbî reyde taxe de etud kerd. Ma çimeyê neweyî ra ke ma xebatanê etudî de dîyar kerd, awe girewte. Nika ma girêdayîşî amade kenê ke do na awe biresno taxe. Ma amanc kenê ke xebata xete çar rojan de temam bikerê, çimeyî şebeke ra girê bidê û kêmanîya awe ya taxa xo wedarnê. Ma herkesî rê sipas kenê ke keda ci tede ya."

'Ma ekîban reyde pîya çimeyê awe dî'

Muxtarê Taxa Kaledîbî Bîlal Yeleşî dîyar kerd ke rîyê problemê awe ra înan muracatê Mudirîya Pêroyî ya DÎSKÎ kerd û seba akerdişê çimeyî piştîdayîşê makîneya karî girewt û va: "Taxa ma de problemê ma yê awe est bî. Ma muracatê Mudirîya Pêroyî ya DÎSKÎ kerd. Ma ekîban reyde pîya çime dî. Înan ma rê makîneya karî şawite û ma çimeyê xo akerd. Înşalah ma tîya ra taxa xo rê awe bidê û kêmanîya ke ma ciwîyenê wedarnê. Ez Mudirê ma yê Pêroyî, ekîbanê ke tîya xebitîyenê û herkesî rê zaf sipas kena ke keda ci tede ya."

Şarê taxe xebate ra memnûn o

Huseyîn Kanat ke şarê taxe ra yo, îzah kerd ke erdlerz de awa înan birîyaye û înan muxtarî reyde pîya seba çareserkerdişê problemî muracat kerd û va: "Erdlerzî de awa ma birîyaye. Ma muxtarê xo reyde pîya muracat kerd. Mudirê ma yê Pêroyî yê DÎSKÎ û Mudirê ma yê Şûbeyê Hêni ekîbanê xo reyde hetkarîya ma kerde, awa ma vete. Ez heme ekîbî rê sipas kena."

Bi temambîyayîşê xebate yeno amanckerdiş ke resayîşê awa şimitişî yê teqrîben 110 kesan ke Taxa Kaledîbî de 22 keyeyan de ciwîyenê, bêro rindkerdiş.

Çarnayox: Mehmet Olmez