Demê neweyî yê perwerdeyî yê Kursanê Huner û Perwerdeyê Meslekî yê Amedî (DÎSMEK) dest pêkeno ke binê banê Serekîya Daîreya Xizmetanê Komelkîyan de xebitîyenê. Bernameyê demê neweyî de 14 warê cîya-cîyayî ca gênê; amanc o yo ke welatî hunerê meslekî bimusê, averşîyayîşê xo yê şexsî xurt bikerê û beşdarê viraştişê hunerî bibê. Perwerdeyî pêro bêpere yê û hûmara kursîyeran sînordar a.

8 waran de perwerdeyê bi sertîfîka

Demê neweyî de 8 waran de perwerdeyê bi sertîfîka do bibê: werdpewjîye/pastakarîye, rayraberdoxê komputerî, miqateyê çermî, perwerdeyê dîksîyonî, muhasebeyo verên, destkarîye (seramîko serdin), kuaforîye û tekstîl. Bi nê perwerdeyan yeno amanckerdene ke zanayîş û hunerê kursîyeran aver şêro, beşdarîya înan a cuya karî xurt bibo û resayîşê înan ê îmkananê karî yê neweyan asan bibo.

Waranê hunerî û teknîkî de kursê bi belgeya beşdarîye

Çarçewaya bernameyê belgeya beşdarîye de zî 6 waran de kursî do bibê: viraştişê kaykilanê darênan, tenbur/perwerdeyê vengî, çînî, amadekarîya hunerê weşan, îdareyê doneyan û nejirnayîşê kerrayan. Bi nê perwerdeyan ke huner, muzîk, enformatîk û viraştişê tradîsyonelî gênê xo mîyan, yeno amanckerdene ke kursîyerî qabîlîyetê xo aver berê û teknîkanê neweyan bimusê.

Perwerdeyî do di merkezanê kursan de bibê

Perwerdeyî ke hetê perwerdekaranê pisporan ra do bêrê dayene, do Merkezê Kursan ê Sumerparkî û Merkezê Kursan ê Goletliparkî de bibê. Tarîx û saetê kursan do prosesê muracatî ra dima kursîyeran rê bêrê vatene.

Muracato peyên 30ê êlule

Muracatî heta 30ê êlule adresa https://dismek.diyarbakir.bel.tr/ ser ra do bibê. Hemwelatîyê ke wazenê derheqê kursan de agahîyê hîrayî bigîrê, eşkenê bi numreyanê 0412 226 22 65 (Merkezê Kursan ê Sumerparkî) û 0412 999 17 03 (Merkezê Kursan ê Goletliparkî) bigêrê.

Tadayox: Mehmet Olmez