Ekîbê “Ca de Çarekerdişî” ke binê banê Serekîya Daîreya Çapemenî Weşan û Têkilîyanê Şarî de xebitîyenê, dewam kenê ke qezayan zîyaret bikerê. Nê xebatî yenê kerdiş ke hewceyîyê hemwelatîyan rasterast bêrê goşdarîkerdiş û xizmetê şaredarîye goreyê nê hewceyîyan bêrê dayîş. Qezaya Pasûrî de esnaf û hemwelatîyan reyde rî bi rî qisey bî.

140 esnafî cayê xo de ameyî zîyaretkerdiş

Ekîban qeza de 140 esnafî zîyaret kerdî û problem û waştişê înan ê derheqê xizmetanê şaredarîye de goşdarî kerdî. Ekîbê ke qehwexaneyan de hemwelatîyan reyde zî ameyî têhet, waştiş û pêşnîyazî girewtî. Hemwelatîyan derheqê awe, rayîr, park, pakkerdiş û rastkerdişê dorûverî de hewceyîyê xo vatî û waşt ke pêdîyayîşê şarî bêrê organîzekerdiş.

Waştişî yewînanê têkilîdaran rê ameyî resnayîş

Problem, waştiş û pêşnîyazê ke pêdîyayîşan de ameyî vatiş, yewînanê têkilîdaran ê Şaredarîya Şaristanê Girdî û şaredarîya qeza rê ameyî resnayîş. Yeno amanckerdiş ke waştişî hîna lez biresê yewînanê têkilîdaran û prosesê çarekerdişî bi hemkarîya mabênê dezgehan bêrê taqîbkerdiş.

Verê cû kombîyayîşê koordînasyonî yê yewînanê têkilîyanê şarî yê Şaredarîya Şaristanê Girdî û şaredarîyanê qezayan de ame qerardayîş ke xebatê warî bi koordînasyon bêrê kerdiş. Zîyaretê Pasûrî zî seba xurtkerdişê nê koordînasyonî ameyî kerdiş.

Xetê têkilîye ameyî parekerdiş

Ekîban ard vîrî ke Şaredarîya Şaristanê Girdî 7/24 xizmet dana û xetê têkilîye pare kerdî. Ame vatiş ke hemwelatî eşkenê bi rayîrê xeta ALO 153 yan zî xeta WhatsAppî ya 0412 153 00 00 problem, waştiş û pêşnîyazanê xo biresnê şaredarîye.

Xeta Alo Şîdetî ameye daşinasnayîş

Çarçewaya xebate de Xeta Alo Şîdetî ya 444 36 21 zî ameye daşinasnayîş. Agahî ameye dayîş ke cinî her game eşkenê bi rayîrê na xete biemnîyet piştî bigîrê.

Çarnayox: Mehmet Olmez