Taleb û waştişê wendekaranê unîversîte ameyî qeydkerdiş
Standê “Şima Bixeyr Ameyî” yê Şaredarîya Amedî ya Şaristanê Girdî ke vernîya Merkezê Cuya Wendekaran ê Unîversîteya Dîcleyî de ronîyabî, badê xebata nêzdîyê aşmêk falîyetê xo qedênayî. Wendekaran tewr zaf derheqê res, pakkerdiş, çalakîyanê komelkî û pêdîyayîşanê ciwanan de talebê xo îfade kerdî; muracatê ke ameyî qeydkerdiş, serekîyanê daîreyanê eleqedaran rê ameyî resnayîş.
Xebatê standê “Şima Bixeyr Ameyî” qedêyayî ke Serekîya Daîreya Çapemenî, Weşan û Têkilîyanê Şarî ronabî ke wendekaranê unîversîte hîna asan biresê xizmetanê şaredarî. Stand 28ê êlule – 23ê teşrîna verêne 2026 de xebitîya; ekîbanê “Ca de Çarekerdişî” uca de goş da taleb, waştiş û fikranê wendekaran û ê qeyd kerdî. Muracatî serekîyanê daîreyanê eleqedaran rê ameyî resnayîş ke bêrê erjnayîş û xebatê hewceyî bêrê ramitiş.
Ekîban goş da talebanê wendekaran
Ekîbanê ke standî de wezîfe kerd, bi taybetî wendekaran reyde ke newe dest bi unîversîte kerdo, rî bi rî qisey kerd û goş da taleb û pawitişanê înan. Formê taleb, waştiş û fikran ameyî pirkerdiş ke wendekarî fikranê xo yê derheqê xizmetanê şaredarî de rasterast biresnê. Wendekaran tewr zaf derheqê resê unîversîte, xizmetanê pakkerdişî, çalakîyanê komelkî û pêdîyayîşanê ciwanan de talebê xo îfade kerdî.
Cayê tarîxî û kulturî yê Amedî ameyî daşinasnayîş
Pê broşuranê ke Serekîya Daîreya Kultur, Huner û Karanê Komelkî amade kerdî, cayê tarîxî û kulturî yê Amedî wendekaran rê ameyî daşinasnayîş. Bultenê Çapemenîye yê DBB'yî zî wendekaran rê ame resnayîş û çîyê werdî ameyî vilakerdiş.
Derheqê piştîdayîşanê perwerdeyî de agahî ameye dayîş
Derheqê piştîdayîşanê perwerdeyî yê Şaredarîya Amedî ya Şaristanê Girdî de wendekaran rê agahî ameye dayîş ke reya verêne unîversîte rê qeyd bîyî; prosesê muracatî zî înan rê ameyî îzahkerdiş.
Çarnayox: Mehmet Olmez
