Xebatê “Ca de Çarekerdişî” dewam kenê ke Şaredarîya Amedî ya Şaristanê Girdî seba goşdarîkerdişê waştişanê şarî û lezkerdişê prosesê çarekerdişî dayî destpêkerdiş. Ekîbê Mudirîya Şûbeyê Têkilîyanê Şarî ya Serekîya Daîreya Çapemenî Weşan û Têkilîyanê Şarî, bi rayîrê standan û zîyaretanê esnafan hemwelatîyan reyde yenê têhet.

Standê têkilîyanê şarî

Ekîban Taxa Huzurevleri û Nêweşxaneyê Perwerde û Cigêrayîşî yê Gazî Yaşargilî yê qezaya Kayapinarî û Meydanê Berê Koyî yê qezaya Sûrî de standê têkilîyanê şarî ronayî. Derheqê rayîr, peyarayîr, binawanî, pakîya dorûverî û hacetanê şaristanî de 50 waştişî ameyî qeydkerdiş. Muracatê ke berpirsîyarîya Şaredarîya Şaristanê Girdî de yê, yewînanê têkilîdaran rê; yê ke selahîyetê şaredarîyanê qezayan de yê zî şaredarîyanê qezayan rê ameyî resnayîş.

Zîyaretê esnafan

Sîteyanê Sanayî yê 2., 3. û 4. de esnafî ameyî zîyaretkerdiş. Ekîban derheqê kanalanê têkilî û muracatî yê şaredarîye de agahî dayî û broşurî vila kerdî. Waştişê esnafan bi nuşteyêko fermî serekîyanê daîreyanê têkilîdaran rê ameyî şawitiş.

Kayapinar de kontrol, pakkerdiş û dermankerdiş

Ekîbanê “Ca de Çarekerdişî” û Mudirîya Zabita ya Şaredarîya Kayapinarî qeza de kontrol kerd. Di cayê karî ameyî morkerdiş ke bêruxsat bîyî. Personelanê zabita vera îşxal û parkkerdişê bêdestûrî yê wesayîtan zî kontrol kerd. Mudirîya Karanê Pakkerdişî ya Şaredarîya Kayapinarî reyde herême de xebata pakkerdişî ame kerdiş. Ekîbanê Serekîya Daîreya Karanê Weşîye zî vera melşe û kêzikan derman eşt. Konteynerê çopî ameyî tamîrkerdiş û cayan de ke hewce bî, konteynerî bi neweyan ameyî bedilnayîş.

Standî do zêde bibê

Yeno plankerdiş ke demê ameyoxî de standê “Ca de Çarekerdişî” taxanê cîyayan de zî bêrê ronayîş. Bi nê xebatan yeno amanckerdiş ke hemwelatî hîna asan biresê xizmetanê şaredarîye û waştişî lez bêrê çarekerdiş.

Tadayox: Mehmet Olmez