Endama Meclîsê DBB'yî Madenkuyu beşdarê Kombîyayîşê Pêroyî yê Kongreyê Îdareyanê Herêmkî û Mintiqayîyan ê Konseya Ewropa bîye
Endama Meclîsê Şaredarîya Amedî ya Şaristanê Girdî Kader Uzun Madenkuyu beşdarê Kombîyayîşê Pêroyî yo 49. yê Kongreyê Îdareyanê Herêmkî û Mintiqayîyan ê Konseya Ewropa bîye ke Strasbourg de bî; tatbîqatê qeyûman û heqê kulturî û komelkî, sere de ziwanê dayîke, ardî rojeve.
Endama Meclîsê DBB'yî Kader Uzun Madenkuyu û Hemşaredarê Şaredarîya Wanî ya Şaristanê Girdî Abdullah Zeydan ke wezîfe ra ame girewtiş, beşdarê Kombîyayîşê Pêroyî yo 49. yê Kongreyê Îdareyanê Herêmkî û Mintiqayîyan ê Konseya Ewropa bîyî ke şaristanê Strasbourgî yê Fransa de bî.
Madenkuyu û Zeydanî pêvînayîşanê xo yê kombîyayîşî de averşîyayîşê prosesî, tatbîqatê qeyûman û qerarê Mehkemeya Heqanê Merdiman a Ewropa yê binpaykerdişê heqan ardî rojeve. Pêvînayîşan de derheqê heqanê kulturî û komelkîyan de, sere de ziwanê dayîke, zî qisey bî.
Serekê Kongreyî û raporteranê Tirkîya reyde Pêvînayîş
Madenkuyu û Zeydan, Temsîlkarê Konseya Ewropa yê Partîya Seypêyîya Şaran û Demokrasî (DEM Partî) Fayik Yagizay û ekîba ey a dîplomasî reyde pîya Serekê Kongreyê Îdareyanê Herêmkî û Mintiqayîyan ê Konseya Ewropa Marc Cools û raporteranê Tirkîya Bryony Rudkin û David Erayî reyde ameyî têhet.
