Fabrîkaya Nanê Şarî ke Şaredarîya Amedî goreyê fehmê şaredarîya komelkî viraşte, abîye.

Akerdişî de Hemşaredaranê Amedî Serra Bucak û Dogan Hatunî ra teber, hemserekê şaredarîyanê qezayan, hemserekê bajarî yê DEM Partî û DBP'yî, temsîlkarê rêxistinanê komelê sîvîlî û zaf hemwelatî beşdar bîyî.

Fabrîka ke qezaya Baglarî Taxa Baxcilaran de ame awankerdene, pê kapasîteya berhemardişê 100 hezar nanan ê rojaneyî do biba tesîsanê berhemardişî yê tewr muhîman ê Amedî ra yew.

Nanê ke yenê berhemardene, do 43 bufeyanê Nanê Şarî de ke cayanê cîya-cîyayan ê bajarî de ameyî awankerdene, bi vayîya munasibe biroşîyê.

Hemşaredaranê Amedî Serra Bucak û Dogan Hatunî ke merasîmî de qisey kerd, îfade kerd ke beşo muhîm ê îstîhdamî yê tesîsî do cinî bibê û îfade kerd ke çarçewaya têkoşînê vera feqîrîya xorîne de hem nanê bi vayîya munasibe do bêro berhemardene hem zî ekonomîya herêmkî do bêro ganîkerdene.

Fabrîka wina ame dîzaynkerdene ke pê parkurê makîneyan ê tamotomatîkan û teknolojîya peyêne xizmet bido.

Tesîsî de etapê verênî de rojane 40 hezar nanî do bêrê berhemardene.

Prosesê ameyoxî de zî kapasîteya berhemardişî do biresa rojane 100 hezar nanan. Çarçewaya polîtîkaya vayîya munasibe de nano 210 gramî do bi 10 TLyî bêro rotene.