Şaredarîya Amedî ya Şaristanê Girdî, golekê awa şimitişî yê heywanan û awedayîşê citkarîye yê qezaya Farqînî ke rîyê varanê giranan ra zerar dîbî, tede xebatê miqate, tamîr û pakkerdişî kerdî. Golekî 5 taxanê dewan de hewceyîya awe ya heywanan û awddayîşê 2 hezar dekaran ra zêdeyêr erdanê citkarîye temîn kenê.

Bi xebatanê ke Serekîya Daîreya Xizmetanê Dewan de yenê ramitiş, yeno amanckerdiş ke hem domdarîya heywandarîye bêra temînkerdiş, hem zî berhemardiş û berhemdarîya citkarîye ya herême bigîrîyê binê emnîyetî. Golekê awa şimitişê heywanan û awdayîşî yê Taxa Çobantepeyî ya girêdayeya qezaya Farqînî de xebata miqate, tamîr û pakkerdişî ameyî kerdiş.

Mihendîsê Zîraetî Tahîr Alanî ke Serekîya Daîreya Xizmetanê Dewan de wezîfedar o, agahî daye ke xebatî hetê ekonomîya herême û cuya dewan ra muhîm ê. Alanî vat ke golekan de warêkê tesîrî yo hîra est o û hewceyîya awa şimitişî ya heywanan a 5 taxanê dewan ê dorûverî pê yena temînkerdiş. Alanî qeyd kerd ke demanê ke demserre pê varayîşan vîyarena, bi awa ke golek de kom bena, 2 hezar dekaran ra zêdeyêr erdê citkarîye yenê awdayîş.

Alanî îfade kerd ke Taxa Çobantepeyî de teqrîben 300 heywanê naxire est ê û bi heywananê ke herêma Karacadaxî ra yenê ardiş, înan reyde hewceyîya awe ya 4 hezaran ra zêdeyêr heywananê pesî zî golekan ra yena temînkerdiş.

Serekîya Daîreya Xizmetanê Dewan, do goreyê bernameyî golekanê awedayîş û awa şimitişî yê heywanan ê taxanê dewan ê bînan de ke şertanê îklîmî û varanê giranan ra tesîr dîyo, xebatanê miqate, tamîr, pakkerdiş û zêdekerdişê kapasîteyî dewam bikera.