Eşkerayîya çapemenîye vernîya Merkezê Kultur û Kongre yê Çand Amedî de ameye dayîş. Hemşaredarê Şaredarîya Şaristanê Girdî Serra Bucak û Emîn Ay, Hemserekê Şaristanî yê DEM Partî Yunus Muratakan, Hemserekê Şaristanî yê Partîya Herêmanê Demokratîkan (DBP) Ruçem Vefa Elyakut û Ahmet Dogan, hemşaredarê Mardîn, Wan, Êlih û Sêrtî yê ke wezîfe ra ameyî girewtiş, parlamenterê DEM Partî, hemşaredarê qezayan, Hemverfekê Meclîsê DBB'yî Demet Ceylan û Ayhan Karatekîn û endamanê meclîsî eşkerayîye de ca girewt.

'Ganî îradeyê şarî bêro şinasnayîş'

Hemşaredara Şaredarîya Êlihî Gulistan Sonuk ke cayê aye de qeyûm ame tayînkerdiş, dîyar kerd ke tatbîqatê qeyûman 10 serrî yo dewam kenê û qeyûman reyde krîzê ekonomîkî, komelkî û sîyasî ameyî meydan. Sonuke vat: “Eke dewlete wazena aştî bîyaro ca, ganî gamanê şênberan bierza û qeyûman hewano. Seba awankerdişê Tirkîyayêka demokratîke ganî îradeyê şarê kurdan bêro şinasnayîş û xespkerdiş biqedîyo.”

'Binpaykerdişê heqê weçînayîş û weçînîyayîşî yo'

Hemserekê Şaristanî yê DEM Partî Yunus Muratakanî dîyar kerd ke polîtîkaya qeyûman eşkera binpaykerdişê heqê weçînayîş û weçînîyayîşî yê şarî yo. Muratakanî vat ke no tatbîqat tena mudaxeleyêkê şaredarîyan nîyo, mudaxeleyêkê destkewteyanê demokratîkan, rêxistinbîyayîşê komelkî, ziwan û kulturê şarê kurdan o.

Ame waştiş ke tatbîqatê qeyûman biqedîyo

Eşkerayîyan de vengdayîşê ney ame kerdiş ke tatbîqatê qeyûman bê ereymendişî biqedîyo û xoserîya demokratîke ya îdareyanê herêmkîyan û heqê beşdarîya şarî ya rasterast a îdareyî bigîrîyo garantî. Ame waştiş ke astengê vernîya heqê perwerde, kultur, huner û xizmetgirewtişî yê bi ziwanê dayîke bêrê hewanayîş; dezgehê cinîyan, merkezê kulturî, dezgehê ziwanê dayîke û mekanîzmayê beşdarîya demokratîke ya şarî ke dewreyê qeyûman de ameyî padayîş, reyna bêrê akerdiş.

Sewbîna ame waştiş ke tedayê vera dezgehanê demokratîkan, rêxistinanê komelê sîvîlî û warê sîyasetê demokratîkî biqedîyê; muameleyê dewreyê qeyûman ê serê çimeyan û malanê pêroyîyan ê şaredarîyan bi zelalî bêrê etudkerdiş û hesabê çimeyanê şarî bêro dayîş.

Çarnayox: Mehmet Olmez