Hemşaredaran bazarê taxe çarçewaya bernameyê Serekîya Daîreya Çapemenî Weşan û Têkilîyanê Şarî de zîyaret kerd. Amancê zîyaretî goşdarîkerdişê rasterast ê waştiş û pêşnîyazanê hemwelatîyan bi.

Şertê xebatanê esnafan ameyî goşdarîkerdiş

Hemşaredaran tezgehî yew bi yew zîyaret kerdî. Înan esnafan ra derheqê şertanê xebate, rewşa bazarî û problemanê herême de agahî girewtî. Waştiş, pêşnîyaz û hêvîyê hemwelatîyan zî ameyî goşdarîkerdiş ke seba herînayîşî ameybî bazar. Hemwelatîyan problemê taxe û şaristanî rasterast Hemşaredaran rê ardî ziwan.

Waştişî ameyî rojeve

Zîyaretî de şertanê xebate yê esnafan ra heta problemanê rojaneyan ê şarê taxe zaf meseleyî ameyî rojeve. Bi taybetî waştişê pakkerdişê biserûberî yê waranê bazaran, berzkerdişê standardanê hîjyenî û serûberkerdişê waranê tezgehan vejîyayî vernî. Esnaf û hemwelatîyan waşt ke xebatê pakkerdiş û hîjyenî biserûber dewam bikerê.

Xizmetê komresî, asfaltkerdişê rayîranê herêma Oglaklîyî, dermaneştiş, xalî saha û cayê mezelan zî waştişanê hemwelatîyan de ca girewt. Hemwelatîyan waşt ke seatê seferanê otobusan newe ra bêrê serûberkerdiş.

Vera îşxalê peyarayîran tedbîr

Hemwelatîyan dîyar kerd ke îşxalê peyarayîran warê hereketê peyayan teng keno. Înan waşt ke tedbîrê lazimî bêrê girewtiş.

Waştiş û pêşnîyazî ameyî notkerdiş

Hemşaredaran Serra Bucak û Emîn Ay waştiş û pêşnîyazê esnaf û hemwelatîyan not kerdî. Hemşaredaran bale ante ser o ke ê warî ra tesbîtê hewceyîyanê şaristanî yê rasterastan û beşdarîya hemwelatîyan a prosesanê qerar û çarekerdişî muhîm vînenê. Înan îfade kerd ke ê amanc kenê problemê şaristanî bi fehmê beşdarîya ca de û aqilê hemparî bêrê çarekerdiş. Waştişê hemwelatîyan do yewînanê têkilîdaran ê şaredarîye reyde bêrê nirxnayîş.

Açarnayox: Mehmet Olmez